Bilboko Arriaga antzokian eman dituzte 37. Sabino Arana sariak, gaur. Nazio Batuen UNRWA agentzia, Bera Bera eskubaloi taldea, eta fundazioaren presidente izandako Juan Mari Atutxa saritu dituzte, baita Eduardo Anitua medikua, Enrike Zelaia musikaria eta Etxeondo enpresa ere.
Arantxa Tapiak, Sabino Arana fundazioko presidenteak, azaldu du askotariko ibilbideak nabarmentzen dituztela sarien bidez, baina ezaugarri bat denak bateratzen dituena: «Gizarteari eskainitako zerbitzua eta Euskadirekiko konpromisoa». Tapiak nabarmendu duenez, saritutako norbanakoek eta erakundeek «sustraiak galdu gabe aurrera egiten duen benetako eta eguneroko Euskadi hori hezurmamitzen dute».
UNRWAren izenean, Raquel Martik jaso du saria, agentziaren Espainiako adarreko zuzendari exekutiboak, eta esan du saria «babes eta erresistentzia keinu bat» dela. Bera Beraren izenean, Tati Garmendia presidentea eta Alba Menendez kapitain ohia izan dira ekitaldian, eta, tituluak nabarmendu ordez, eskubaloi taldeak sustatzen dituen balioetan egin dute azpimarra. Oholtzara igo dira Anitua, Zelaia eta Etxeondoren sortzaileak ere, Rodrigo-Uranga sendiko kideak.
Ikusi gehiago
Azken saria Atutxak jaso du. Erakundeetan egindako ibilbidean lagun izan dituen guztiekin partekatu nahi izan du saria, eta, «bereziki, indarkeriaren urte gogorrenetan» haren «segurtasuna bermatu» zutenekin. Atutxak beharrezkotzat jo ditu memoria, bizikidetza demokratikoa eta «polarizazioari demokrazia gehiagoz eta hobeaz aurre egitea», eta gogoan izan du Begoña Zalduegi emaztea, 2023an zendua.
