Azken hiru urteetan Palestinako egoera okertu besterik ez dela egin salatzeko, urriaren 8an berriz kalera ateratzeko deia egin du Gernika-Palestina plataformak: elkarretaratzeak egingo dituzte Euskal Herriko udaletxeen aurrean, 19:00etan, Gernikaren herritik, genozidiorik ez! Gerrarik ez! lelopean. Yala Nafarroak urriaren 3rako Iruñean deitutako manifestazioarekin ere bat egin dute.
Gaur Donostian egindako agerraldi batean, deitzaileek gogora ekarri dute Gazako sarraskia ez dela eten: eremuaren zati handi bat bereganatua duela Israelgo armadak, iaz su etena adostu zutenetik 1.300 pertsona baino gehiago erail dituela Israelek, eta 8.000 gorpu berreskuratu ezinik dabiltzala Gazako herritarrak, besteak beste. Zisjordanian ere okerrera doa egoera, plataformaren arabera: aurten, kolonoen 1.200 eraso baino gehiago izan dira. «Edozein txinpartak egoera gaiztotu dezake, eta atzera bueltarik gabeko agertoki bat eragin», ohartarazi dute.
Era berean, mundu osoan «genozidioak dakarren deshumanizazio forma guztiak nagusitzen» ari direla deitoratu dute. Hala, «hausnarketa sakona» galdegin diote euskal gizarteari: «Ezin dugu onartu, ezin dugu normalizatu, eta ahal den guztietan mobilizatu behar dugu palestinarren itxaropenari eusteko, eta argi eta ozen adierazteko: Gerrarik ez!».
