Zabalzaren heriotza «egokiro» ikertu behar dela uste du Zupiriak

Espainiako justizia sistemak ez zuen Mikel Zabalzaren heriotza «behar den moduan» ikertu, Bingen Zupiria Eusko Jaurlaritzako bozeramailearen arabera. Atzo goizean egin zituen adierazpenak Radio Euskadin, eta, haren ustez, Espainiako Gobernuak memoria ekinaldiak egin eta biktimak errekonozitu beharko lituzke, Jaurlaritzak egin duen moduan. «Eusko Jaurlaritzak izendatu du Mikel Zabalza herrialde honetan egon den bortizkeria bidegabearen biktima», esan zuen.

Zabalzaren heriotza «era egokian» ikertzeko eskatu zuen Zupiriak, «egon daitezkeen gaizki ulertuak argitzeko». Apiril hasieran igo zuen mailaz Espainiako Gobernuak auzian nahastuta egon zen Arturo Espejo guardia zibila. Teniente jeneral izendatu zuten.

«Urte horietan, estatuak modu bidegabean eta ez-legitimoan erabili zituen boterea eta bortizkeria», adierazi zuen Zupiriak. Haren berbetan, «ondorio izugarriak» izan zituen gizartearentzat, eta sasoi hori hobeto ikertu behar dela azpimarratu zuen.

EAJk, EH Bilduk eta Elkarrekin Podemosek segituan salatu zuten maila igoera, eta esan zuten erabakiak biktimak «umiliatu, iraindu eta berriz biktimizatu» dituela. Eusko Legebiltzarrean salatu zuten erabakia ez dela kasu bakana: «Zoritxarrez, estatuko indarkeriaren egileei emandako maila igoeren, kondekorazioen eta sarien beste kasu bat da».

Espainiako Barne ministro Fernando Grande-Marlaskak igoera defendatu du asteon, Espainiako Senatuan, Espejo ez delako inoiz egon «inongo ebazpen jakinetan inputaturik».