2023ko urritik hona Gazan gertatzen ari den guztia ikusita, ez dakit ezer defini daitekeen beste gauza bat baino mingarriagoa. Guztia da izugarria; jasanezina. Edozelan ere, lekutik atera ninduen NBEk gazatarrak gosez hiltzen ari direla onartu zuela jakiteak. Orain? Noiztik ari gara entzuten umeak gosez hiltzen direla Gazan? Noiztik ari zaizkigu kontatzen laguntza humanitarioa daramaten kamioiak ezin direla bertara sartu? Noiztik ari gara ikusten kamioien aurrean eserita dauden israeldarren irudiak Gazan bizi diren pertsonek gosez hiltzen segi dezaten? Noiztik entzun ditugu Israelgo politikariak gazatarrak deshumanizatzen? Eta orain, bat-batean, begietako benda kendu egin balute legez, Gazan gosetea dagoela onartu dute. Ez daukate lotsarik: ez NBEk, ez Europak, ez inork. Ezta geuk ere. Boikoterako deia egiten dugu, baina egunerokoan zaila delako, edo ez dakit zer asko gustatzen zaigulako, edo ezer ezin dugulako egin halako basakeriaren aurrean; edo nik ez dakit zergatik, baina geure bizimoduan jarraitzen dugu aurrera. Eta sarraskiak ez dauka etenik.
Israel lurreko ofentsibara doa. Azken erasoa. Zutik gelditzen den apurra eraitsi, hil, bortxatu, atxilotu, bahitu… eta kito Gaza! Eta gose hori, Israelek Gaza bereganatzeko duen gosea ez du NBEk sekula onartuko. Gazaren atzetik Zisjordanian zer egingo duten usaintzen ari gara, baina ez dute sekula halakorik esango. Eta oraindik ere, gure komunikabideek Hamasi buruz, su-etenari buruz, gertatuko ez direla badakigun alde biko irtenbideei buruz hitz egiten jarraitzen dute. Israelen gosea Gaza jaten ari da, oso-osorik. Honezkero, gainera, badakigu zertarako. Trumpek oso ondo esplikatu zituen hango itsasertzerako dituzten planak.
Existitzeak ere lotsa ematen du. Zuzenean ikusi dugu nola garbitu nahi duten herrialde bat jendez, eta ez da ezer gertatu. Ez da ezer gertatzen ari. Eta batek pentsatzen du Israel asmatu zutenei beste edozein lekutara joatea bururatu izan balitzaie orain beste herrialde bat izango litzatekeela desagertze arriskuan. Eta aldi berean, bat pentsatzen hasten da ea zergatik ez duten berriro beste nonbait egingo. Munduak israeldarrei inkontzienteki zein kontzienteki eman dien inpunitatea aurrekari arriskutsua da. Ez genuke geldi egon behar. Ez genuke Palestina ez den beste izenik onartu beharko Israelek okupatzen dituen lurretarako.
