Bada nor Arrasate. Euskal Herri osoari kooperatibismoaren eredua erakutsi zion, eta enpresa munduan gauzak egiteko beste era bat egon zitekeela frogatu zuen. Ez zela zertan izan dirua egitea helburu, baizik eta taldeko kideak, alegia, pertsonak, zaintzea: elkarlan eta elkartasunez. Gero iritsi zen munduratu beharra, globalizazioaren arau gupidagabeei aurre egin eta pertsonari ez baizik eta kapitala pilatzeari besterik begiratzen ez dion sistema kapitalistaren arauetara moldatu beharra. Txalupa itsasontzi bihurtu zen lehenik, eta transatlantikoa gero. Eta bidaia luzeak kontinente askotara eraman zuen: Amerika, Asia, Europa...
Itsas azpiko korronte sakonek hondoratu dute transatlantikoa. Galdu da ikurra. Fagorrenak egin du. Bidaia horretaz zer ikasi handia dauka kooperatibismoak. Zeren eta, Fagorrek ez, baina kooperatibismoak badu, izan behar du, etorkizunik. Eta hor, hasierako balioak ez ezik, tamainaren eta tokikotasunaren kontzientzia berreskuratu beharko da. Hurrengo bidaia, beharbada, txalupaz egin beharko baita.
Hizpideak
Arrasate
Iruzkinak
Ez dago iruzkinik
Ordenatu
