Entzutekoak

Suposatzen dut azkenean entzunen ditudala. Guardia Zibileko bi goi kargudunen arteko solasaren audioez ari naiz, Mikel Zabalza nola torturatu zuten iruzkinduta, zertaz aritzen ziren ongi zekitela aditzera emanez. Twitterren notizia ikusi eta play sakatu dut eta kalitate eskaseko soinua abiatu da, baina berehala gelditu behar izan dut. Ez dut sabelik izan. Esaldi bat edo beste ikusi dut hortik. Eguna luzea da eta, notiziei begira bizi naizenez, zaila da ez-entzun honetan luze jarraitzea. Baina ez dut nik bilatuko. Ez-entzun honetan esan dut, hitza asmatuta-edo. Kasu honetan, eta torturez ari garela, ezjakintasunaz hitz egitea ez dagoelako. Horregatik, uste dut, ez ditut entzun behar.

Baieztapena badakarte, bai, baina jakiteko berririk ez. Intxaurrondon gertatutako izugarrikeriak ukatuko dituenik bada? Jakiteko berrik ez, baina gutxienez baieztapena dira. Norentzat, baina? Halako baieztapen sonoroa behar zutenak dira arreta gutxiena eginen diotenak, ezikusi handiena, edo ez entzun handiena eginen diotenak, iraganaren izara zuria, orrialde-pasa, ozenen aldarrikatuko dituztenak, norbaitek hartara estutuz gero. Tira, haiek ere ez zuten baieztapenik behar. Argudioak pixka bat aldatu beharko dituzte, beharbada.