23 urte zituela Espainiako Vuelta bigarren amaitu zuenean, askok aurreikusi zuten Enric Masek etorkizun oparoa izango zuela. Balearretako txirrindulariak ibilbide ona egin du, bai, baina beste zortzi urte behar izan ditu, behingoz, itzuli handi bat irabazteko. Aurrez, podiumean beste lau alditan izandakoa da, eta 31 urterekin lortu du lehen aldiz maila gorenera igotzea, Granadan (Espainia).
Izatez, aurtengo edizioa Tadej Pogacarrena izateko bidean zihoan, baina, eroriko baten ondorioz, lasterketa utzi behar izan zuen esloveniarrak. Sortu zitzaion aukera ezin hobeto baliatu du Masek; Pogacarrek alde egin osteko egunean jantzi zuen elastiko gorria lehen aldiz, eta ordutik ez du erantzi. Azkenean bi minututik gorako tartea atera die Primoz Roglici (Jumbo) eta Felix Galli (Decathlon), bigarren eta hirugarren sailkatuei.
2026ko Vueltako azken etapa Tobias Johannessen norvegiarrak (Uno-X) irabazi du, esprintean, Alessandro Romeleri (Astana) aurrea hartuta. Laugarren amaitu du Vueltak utzi duen beste izen handi batek, Matthew Brennanek; Vismakoak bost etapa irabazi ditu denera.
Gainontzean, taldekako sailkapenean Decathlon izan da onena. Puntukako sailkapenean, Wout van Aertek (Visma) irabazi du; mendikoan, Santiago Buitragok (Bahrain); eta Oscar Onley (Ineos) izan da gazterik onena.
