Bera Bera buru-belarri ari da denboraldiko lehen partida prestatzen. Etzi jokatuko du, etxean, Galiziako Porriño taldearen aurka. Ligako partida izango da hori, eta, Europako Ligari azaroaren 8an ekingo dio, Frantziako Dijon taldearen kontra. Atean aldaketa nabarmena izan du Bera Berak: Nicole Wiggins fitxatu du (Madril, 2000), Tamara Kosticen ordez. Wiggins etzi ariko da lehen aldiz Donostiako taldearekin partida ofizial batean.
Gustura zaude denboraldiaurrean egindakoarekin?
Bai, oso. Erritmoa azkar hartu dugula uste dut. Hasieran jarri genituen helburuetako bat horixe izan zen, erritmoa azkar hartu eta maila onean hastea, txapelketetako erritmoa hartzeko zain egon gabe. Lehenengo lagunartekoetan ere ikusi zen taldeak zer-nolako erritmoa zeukan, eta, oraingoz, helburu hori lortu dugu.
Zer egin zaizu gogorren denboraldiaurrean?
Ez nengoen ohituta prestaketa fisiko mota honetara. Eskubaloiaren aldetik, entrenamenduak oso dinamikoak izan dira. Une oro oso kontzentratuta egotea eskatzen dizuten entrenamendu horietakoak. Ez dira oso luzeak izaten, eta horrek kontzentrazioari eusten laguntzen dizu entrenamenduak irauten duen bitartean.
Taldea lehiatzen hasteko prest ikusten duzu?
Bai, noski, inongo dudarik gabe.
Erraz ari zara ohitzen Bera Berara?
Bai. Etxera itzultzea bezala izan da niretzat, eta horrek errazagoa egiten du dena. Hizkuntza aldetik ez dago arazorik, jokalari asko lehendik ere ezagutzen ditut… Horrela, dena da errazagoa.
Zerk konbentzitu zintuen Bera Berara etortzeko?
Aurreko denboraldian bikain aritu ziren. Europako Ligan ere ederki lehiatu ziren goi mailako aurkarien kontra. Horrek ere lagundu zidan erabakia hartzen, eta ekarpena egiten saiatuko naiz, Europan beste pauso bat emateko.
Kontuan hartuta zu fitxatu zaituztela eta Lucia Prades bikain aritu zela denboraldi amaieran, esan daiteke Bera Beraren atea ondo babestuta dagoela?
Hori kantxan ikusiko da [barrez]. Uste dut asko daukagula taldeari emateko. Ardura gehiago hartzeko eta defentsari gehiago laguntzeko gai gara. Horiek dira biok ere denboraldi honetarako dauzkagun helburuetako batzuk. Beraz, esan daiteke ondo babestuta dagoela, bai. Hala ere, gauza bat da orain horretaz hitz egitea, baina, gero, lan asko egin behar da, eta denboraldia oso luzea izaten da.
Zerk harritu zaitu gehien klub berrian?
Kluba zein etxekoa den eta gauzak nola egiten dituzten ikusteak. Gauzak oso ongi egiten dira. Denari ikuspuntu profesional batetik begiratzen zaio, eta erabakirik onena hartzen saiatzen dira beti, taldearen errendimenduaren mesedetan.
«Uste dut Europako Ligan ezin dela inoiz helburu jakinik jarri aurreko denboraldian lortutakoari erreparatuta»
Aurreko denboraldian, Europako Ligako Lauko Finalaren atarian geratu zen Bera Bera. Zer helburu dituzue lehiaketa horretarako?
Uste dut Europako Ligan ezin dela inoiz helburu jakinik jarri aurreko denboraldian lortutakoari erreparatuta. Esaterako, Dijon, aurten ligaxkarako sailkatzeko kanporaketako aurkari izango duguna, hirugarren izan zen aurreko denboraldian Lauko Finalean. Aurten, are talde hobea osatu dute. Beraz, kanporaketa oso zaila izango da, eta denboraldiko lehen bi finalak izango dira guretzat. Uste dut kanporaketa hori gainditu behar dugula lehenik, eta, sailkatuz gero, helburu bat jarri. Zaila da orain Lauko Finalaz hitz egitea. Saiatuko gara, noski, baina oinak lurrean izan behar ditugu, eta gogoratu aurkari oso gogorra dugula. Dijonen aurkako 120 minutu horiei aurre egitea da gure lehen helburua.
Eta zein izango da Dijon mendean hartzeko gakoa?
Mailari erreparatuta, iruditzen zait lehiatzeko gai izango garela. Partidetako tarte garrantzitsuak kudeatzeko garaian egongo da diferentzia. Baloi gutxiago nork galtzen dituen eta aurkariak egiten dituen aldaketei hobekien nor egokitzen den, huraxe sailkatuko da. Egoera guztiak ondo kudeatu beharko ditugu, irabazten edo galtzen ari bagara ere.
Zein uste duzu dela Espainiako ligan eta Europan lehiatzearen arteko desberdintasun nagusia?
Gehienbat, jokatzeko modua eta erritmoa. Fisikoak ere izan dezake zerikusirik. Europako aurkarien jokoa ez da hain landua izaten, baina egiten dituzten gauzak ondo menderatzen dituzte, eta ederki egiten dituzte.
Nola ikusten duzu denboraldi honetako Espainiako liga?
Maila ona ikusten dut. Aurreko denboraldian Europan lehiatu ziren Espainiako ligako taldeak ederki aritu ziren. Oso ondo lehiatu ziren beste herrialdeetako ligetan aurrean zebiltzan aurkariekin, eta horrek esan nahi du gauzak ondo egiten ari direla. Egia da aurten jokalari askok martxa egin duela; beraz, ikusiko da haien falta sumatzen den ala ez.
Zer uste duzu egin behar duzuela ligan erregular aritzeko, kontuan hartuta lehiaketa luzea dela?
Hainbat faktore hartu behar ditugu kontuan. Batetik, Europa. Iaz ikusi zen astero partida bat gehiago jokatzeak eragina duela. Bera Berari kostata aritu zen partida askotan, eta zenbait galdu egin zituen. Azkenean, nekea agertzen da, eta horrek ez dizu uzten zenbait partidatan bete-betean aritzen. Beste gako bat izango da partida guztietan dena emanda aritzea. Nahiz eta batzuetan jo eta su arituta ere ez zaren bete-betean egoten, oso garrantzitsua da partidako tarte garrantzitsuak ondo kudeatzea.
Emaitzak alde batera utzita, zuk zer helburu daukazu denboraldirako?
Hori niretzat gorde ohi dut. Neure buruari asko eskatzen diot jokalari gisa. Askotan, ia ezinezkoak diren gauzak ere eskatzen dizkiot. Uste dut zeure buruari zenbat eta gehiago eskatu orduan eta hobeto dela. Helburu moduan jarri duzun geldiketa kopurura iristen ez bazara ere, dena emanda arituko zara kopuru horretara iristeko. Ardurak hartu, edozer irabaz dezakeen talde honetan konfiantza hartu, tituluak irabazten saiatu, eta bolada zailetan taldeari zerbait emateko gai izan; horixe nahi nuke.
