Imanol Ansa erremontista argi mintzatu da Oriamendik hura Banakako Erremonte Txapelketatik kanpo utzi ostean: «Ez dute lortuko ni erremontetik urruntzea». Urnietan egin du agerraldia, bere herriko udal pilotalekuan, gertatutakoaren inguruan bere iritzia emateko. «Enpresak hartutako azken erabakia bidegabea da», eta txapelketan parte hartzeko eskubidea zuela defendatu du: «Ahaleginak eginda eta emaitzak lortuta irabazi nuen eskubide hori».
Oriamendik atzo aurkeztu zuen buruz buruko txapelketa, baina egun batzuk lehenago jakin zen ez zutela Ansa hautatu bertan parte hartzeko. Aurretik, gainera, hilabeteko zigorra jarri zioten, eta Summer Season txapelketan eta Zarauzko torneoan ez zuen lehiatzerik izan.
Enpresak ezarritako hilabeteko zigorra bete duela baieztatu du Ansak, eta zer zigor ipini zion azaldu du: «Hilabete jokatu gabe, entrenatu gabe eta Galarretan sartu gabe egon naiz; hilabete egin dut etxetik kanpo». Ados egon ez arren zigorra bete egin duela dio: «Jarrera ona izan, eta bete egin dut, eta une oro errespetatu ditut enpresak hartutako erabakiak», eta zigorra amaitzean normal lehiatzera itzuliko zelakoan zen. Baina errealitatea oso bestelakoa izan da.
Ansak argudiatu duenez, iazko txapelketan irabazi zuen Banakako Txapelketan parte hartzeko eskubidea, kirol merezimenduz, hirugarren izan baitzen; «eskubidea kentzen» ari zaizkiola salatu du. Azaldu duenez, bera erremontean dabilenetik, aurreko urteko emaitzak zehazten du jokalari batek hurrengo urteko txapelketan jokatuko duen ala ez, nahiz eta enpresak kontrakoa esan.
«Ahaleginak eginda eta emaitzak lortuta irabazi nuen buruz buruko txapelketan parte hartzeko eskubidea»
IMANOL ANSA Erremontista
Azken urtea du hau Oriamendik erremontean, eta, horregatik, Ansak eta beste pilotari batzuek erremontearen inguruko beste erakunde eta eragile batzuekin batera lanean hastea erabaki zuten, «etorkizunarekin kezkatuta» baitzeuden. Haren ustetan, Oriamendiri ez zaio gustatu pilotariek hori egitea, eta horretan inplikatu izanak «ondorio pertsonalak eta kirol arloari lotutakoak» ekarri dizkiola esan du Ansak.
Haren arabera, helburu bakarra izan du: «Erremonte batuago, sendoago eta gardentasun handiagokoa egitea». Bere egoera salatzeaz gain, «begirunea, elkarrizketa eta tratu berdintasuna» eskatu ditu, eta «erremontearen etorkizuna defendatzea» xede duela azaldu du.
Haren hitzetan, aurtengo denboraldia amaitu du, baina erremontearekin duen konpromisoa ez da bukatu: «Etorkizunean ere erremontearen parte izan nahi dut, eta erremontearen familia berriro elkartzeko bidean izango nauzue».
