Iazko finala errepikatu da Lau eta Erdiko Txapelketan. Peio Etxeberriak Altuna III.a kanporatu zuen atzo, eta Zabalak Murua, gaur, Gasteizko Ogeta pilotalekuan. Arrasateko pilotaria izan da aurtengo txapelketako ezusteko handia; finalaurrekoari ere ondo ekin dio, baina luze egin zaio partida eta 22-11 galdu du azkenean.
Norgehiagokak bi zati erabat ezberdin izan ditu. Zabala dominatzen hasi da (6-2), Murua ezkerrez jokatzera behartuz. Tantoek aurrera egin ahala, ordea, gipuzkoarrak lortu du jokoa bere eremura eramatea, eta eskuinez min egiten hasi da. Urduri jarri da Zabala orduan, eta bizpahiru pilotakada huts egin ditu (9-9).
Hortik aurrera, baina, erabat bestelakoa izan da partida. Tantoei sekulako abiada sartu die Zabalak, eta Murua atzean jokatzera behartu du.
Une horretatik aurrera ez zegoen zer eginik. Nahieran jokatzen hasi da pilotari errioxarra: ezkerrez bizi jotzen, tantoak modu ugaritara bukatzen... Muruak ezin izan du bere jokoa egin, eta, borrokan segitu duen arren, aurkariak ez dio aukerarik utzi. Azken tantoetan 13-2koa izan da partziala.
Zabalak jarraian jokatuko duen lau eta erdiko bigarren finala izango da azaroaren 22an Bilboko Bizkaia pilotalekuan jokatuko dutena. Iaz Etxeberria izan zen txapeldun, ea aurten.
