Lau eta Erdiko Txapelketako finalaurrekoetarako txartel batek badu jabea jada: Javier Zabala. Errioxako pilotariak 17-22 hartu du mendean Jon Ander Peña Logroñoko (Espainia) Adarraga pilotalekuan. Multzoko bigarren postua datorren astean erabakiko da Peña II.aren eta Altuna III.aren arteko lehian; Laso, berriz, txapelketatik kanpo geratu da gaurko emaitzaren ondorioz.
Peñak eta Zabalak neurketa ikusgarria jokatu dute Logroñon. Lehen erdia oso parekatua izan da; Peñak gehiago dominatu du, baina errematean fin aritu dira biak, eta batek emandako kolpeari azkar erantzuten zion besteak. Zabala presaz aritu da une batzuetan, protestan ere bai, baina ez du kontzentrazioa galdu, eta lan erdietara parean heldu dira (11-11).
Ikusi gehiago
Orduan piztu da Errioxako pilotaria, publikoa alde zuela. Peña atzean jokatzera behartu du, eta ondo aukeratu ditu erremateak egiteko uneak; Peñak, alderantziz: tantoa azkarregi amaitzen saiatu da behin baino gehiagotan, eta, azkenean, sei pilota galduta amaitu du partida.
Horrela, Zabalak tartea zabaldu du 13-21 jarri arte. Peñak une horretan lortu du lau tanto erreskadan egitea, baina errioxarrak lortu du partida biribiltzea (17-22). Finalaurrekoetako aurkariaren zain da jada.
