Alex de la Iglesiak (Bilbo, 1965) eta Jorge Gerrikaetxebarriak (Aviles, Espainia, 1964) sortutako 30 monedas telesailak goia jo du HBO Max plataforman. Hainbat astez, plataforma horretan mundu osoan gehien ikusi den telesaila izan da; azaroa osorik hartuta, gehien ikusienen artean hirugarrena izan zen. Gaur estreinatu dute bigarren denboraldiko zortzigarren eta azken atala. De la Iglesia eta Gerrikaetxebarria dira gidoilari eta ekoizle eragileak, eta zuzendaria Bilboko zinemagilea da.
Lehen denboraldia ere arrakastatsua izan zen. AEBetan ikus-entzule ugari izan zituen. Gerrikaetxeberriak BERRIAri zera esan zion 2020ko abenduaren 8an: «Ameriketako Estatu Batuetako arduradunek lehen atala ikusi zutenean erabaki zuten han ere ematea, eta hori ez da ohikoa Europako ekoizpenekin». Izan ere, Internet bidezko plataforman ez ezik, HBO katean ere eman zuten AEBetan.
The New York Times egunkariak berriki 2023ko telesail onenen artean hautatu du 30 monedas. Bigarren denboraldia Sitgsesko nazioarteko zinema jaialdian (Katalunia) estreinatu zuten. Horrez gain, Austingo Fantastic Fest jaialdian (AEB) proiektatu zuten.
Bigarren denboraldiko aktore berrien artean Najwa Nimri Urrutikoetxea (Iruñea, 1972) eta Paul Giamatti (New Havern, AEB, 1967) daude.
Ziurtzat jo daiteke hirugarren denboraldia grabatuko dutela. Pokeepsie Films ekoitztetxearen lan bat da telesaila —De la Iglesiaren bazkidea Carolina Bang da—. De la Iglesia une honetan Netflix plataformarentzat ari da telesail bat egiten: 1992. Sevillako Expo 92 erakusketan girotutako thriller bat da. Hilabete batzuk beharko dira estreinaldirako.
