Gasteizko FesTVal telebista jaialdia etzi hasiko da, irailak 1, eta hurrengo larunbatera arte iraungo du. Azkeneko egunean egingo dute jaialdiko gala berezia, irailaren 6an. Makina bat sari emango dituzte ekitaldi horretan; tartean, jaialdiak ETB1eko Mihiluze lehiaketa —irailaren 15ean hasiko du denboraldia— eta ETB2ko Vaya semanita umore saioa sarituko ditu. Gainera, Joan Ramon Mainat sarietako bat Klaudio Landa ETBko aurkezleari emango diote. EITB taldeak urtero sari bat eman ohi du jaialdian, eta aurten Alfonso Sanchez Izquierdo Galiziako irrati-telebista publikoko zuzendari ohiari emango dio —La Razón egunkariko zuzendaritzan ibilitakoa da Izquierdo—.
Sari gehiago ere emango dituzte jaialdiko galan: AISGE/FesTVal interpretazio saria Gabriel Guevara aktoreari emango diote; FesTVal FORTA saria —kate autonomikoen federazioarena— lehen aldiz emango dute, eta, hain zuzen ere, Atrápame si puedes, Andalucía Directo eta En compañía programak sarituko dituzte; FesTVal Lanzarote saria Jose Fernandez Kanaria uharteetako kazetariari emango diote; Constantino Romero saria Antonio Pelayo kazetariak jasoko du; eta, Klaudio Landak ez ezik, Joan Ramon Mainat sari bana jasoko dute Vicente Vallesek, Ana Maria Bordasek eta Risto Mejidek ere. Gainera, Espainiako kateetako beste hamar saio sarituko dituzte.
Astelehenetik aurrera, Espainiako, Euskal Herriko, Herrialde Katalanetako eta Galiziako kate nagusiek denboraldi berrirako prestatu dituzten programen aurkezpenak egingo dituzte Arabako hiriburuan. Iraileko lehen egunean bertan, Mediaset, AMC Networks International, Atresmedia eta Asturiasko RTPA katea saioen prentsaurrekoak egiten ariko dira. Iraileko bigarren egunean, berriz, Euskal Telebistak programazio berria aurkeztuko du. ETBk hurrengo egunetarako bi aurkezpen ditu egitarauan, biak gaztelaniazko saio berrienak: Así se escribe un crimen eta El otro lado de la mesa. ETB2 kateak datozen egunetan estreinatuko ditu biak. ETB1eko saio berriek ez dute propio aurkezpenik izango. Jaialdian parte hartuko dute RTVEk eta Movistar Plusek ere.
Irailaren 5ean, bestalde, ETBk, TVGk eta 3Catek elkarrekin ekoitzitako telesail bat aurkeztuko dute: Pensión incompleta. Aurreneko aldiz, telesail bat euskaraz, galegoz, katalanez eta gaztelaniaz grabatuko dute. Road movie moduko bat izango da, eta Euskal Herrian, Galizian eta Herrialde Katalanetan filmatuko dute datozen hilabeteetan. Gasteizko aurkezpenean jakinaraziko dute zein ariko diren aktore lanetan.
Irailaren 6an, Galiziako telebista publikoak A miña gran cidade entretenimenduko saioa aurkeztuko du jaialdian.
Euskara hutsezko aurkezpenik ez da izango; salbuespen bakarra izango da, asteartean ETBk euskarazko saioen berri emango baitu programazioaren aurkezpenean.
