Euskaldun izateagatik jasan zituztenak, jasaten dituztenak eta ez jasateko egin daitezkeenak bildu ditu Azpeitiko (Gipuzkoa) Zaparraie euskara taldeak Euskaldunak: etxean arrotz dokumentalean. Kulturaz kultur kooperatibaren laguntzarekin ondu zuten, eta abenduaren 20an estreinatu. Gidoia Irati Urdalleta Lete BERRIAko kazetariarena da. Telebista konbentzionalean bihar ikusi ahalko da aurrenekoz, Hamaikan, 22:00etan. Larunbatean eta igandean ere emango dute, ordu berean.
Dokumentalean 1950eko hamarkadatik gaur egunera arteko lekukotzak jaso dituzte. «Hasierako testigantza haietan, indarkeria agerikoagoa da: nola jotzen zituzten eskolan, nola baztertzen zituzten, nola idatzi behar zuten berrehun aldiz No hablaré en vasco [Ez dut euskaraz hitz egingo]... Baina gaur egun ere badago indarkeria: lagun batekin euskaraz aritzea eta beste batek kargu hartzea, «tortilla pintxo bat» euskaraz eskatu eta ulertu nahi ez izatea... Hori ere bada indarkeria», azaldu zuen Urdalleta Letek BERRIAn, abenduaren 19an.
Euskararen kontrako politikek zer ondorio dituzten jaso zuten dokumentalean. «Menderakuntzari eta zapalkuntzari aurre egiteko sortutako herri ekimenaren gorazarre bat ere bada dokumentala», dio Urdalleta Letek.
🎥 'Euskaldunak: etxean arrotz' dokumentala asteburuan ikusgai Hamaikan
— Hamaika Telebista (@HamaikaTb) March 10, 2026
Euskaldunek jasan izan dituzten eta oraindik ere jasaten dituzten zapalkuntzei buruz hainbat azpeitiarren testigantzak bildu dituzte. Ez galdu! 👇
🗓️ Ostirala
🕙 22:00
🔗 https://t.co/0sAXGfwXKl… pic.twitter.com/Kkwkq9cxve
