2024. urtean argitara emandako literatura uzta osoa izan du irakurgai 111 Akademiak, eta irakurgai horien guztien artetik atera da garaile Miren Amurizaren Pleibak eleberria. Unai Elorriagaren Francesco Pasqualeren bosgarren arima eleberria izan du lehiakide Amurizak, aurtengo sariketako azken bozketan.
111 Akademiaren azken saria da Miren Amurizak jasotakoa, ia hiru hamarraldiren ostean bukatutzat eman baitu bere ibilbidea akademiak. Aurtengo lehiaketako bigarren bozketa fasean eman zuten aurrera egiteko zailtasunen berri, eta gaur baieztatu egin dute albistea. Amasa-Villabonako (Gipuzkoa) Hika txakolindegian izan da saria banatzeko ekitaldia; idazleak ez ezik, Thierry Biskary kantariak eta Mirari Martiarena eta Idoia Torregarai aurkezleek ere parte hartu dute bertan.
