Oraingoz, ez du aurrera egingo Errenteriako (Gipuzkoa) Xenpelar bertso eskolako irakaslearen aurkako prozesu judizialak, Gipuzkoako fiskaltzak auzia artxibatu baitu. Horren arabera, ez dago aurrera egiteko nahikoa ebidentziarik, ezta probarik edo salaketarik ere. Argudiatu duenez, ezaguna den biktima bakarrak 17 urte ditu, eta ez hark ez haren senideek ez dute salaketarik aurkezteko asmorik.
Hamabi eguneko ibilbidea izan du prozesu judizialak, Errenteriako Udalak ekainaren 4an jarri baitzuen Ertzaintzaren eta Adingabeen Fiskaltzaren esku auziari buruz zeukan informazio guztia; Polizia Judizialak maiatzaren 29an egin zion horretarako eskakizuna. Errenteriako alkate Aizpea Otaegik, berriz, ekainaren 5ean deklaratu zuen fiskaltzaren aurrean, helarazitako dokumentazioa egiaztatzeko. Hain justu, bertso eskolako irakaslearen kontrako salaketak azalera atera zirenetik, Errenteriako oposizioak udalaren jokabidea izan du jomugan.
Aintzat hartzekoa da, edonola ere, Bertsozale Elkarteak eta Errenteriako eta Oiartzungo (Gipuzkoa) mugimendu feministek behin baino gehiagotan berretsi dutela «salaketa publiko bat» egitea zutela helburu, ez irakaslearen aurkako prozesu judizial bat abiaraztea. Hiru eragile horiek maiatzaren 28an eman zuten Xenpelar bertso eskolako irakasleen erasoen berri. Kontatu zutenez, 2018an izan zuten lehenbiziko erasoen berri, eta salatu zuten gizon hark «bere posizioa eta erreferentzialtasuna» baliatu dituela «modu sistematizatuan botere harremanak garatzeko eta erasotzeko». Bertsozale Elkarteak barne prozesu bat abiatu zuen.
