Hatortxu Rocken helburua euskal preso eta iheslarien eskubideen alde egitea da, hasiera-hasieratik. 24 urte joan dira festibala lehenbiziko aldiz antolatu zenetik, eta egoera franko aldatu da azken urteotan, jaialdiko antolatzaileen azpimarratu dutenez, azkenik iritsi baita «sakabanaketa politika krudelen amaiera». Hala eta guztiz ere, aldarrikatu dute premia guztiak ez direla desagertu, eta, horregatik, aurten ere eginen da Hatortxu Rock, Atarrabian (Nafarroa), abenduaren 16an. Talde hauek iragarri dituzte: Auxili, Los Chikos del Maiz, Burutik, Los Zopilotes Txirriaos, DJ Reimy eta Skabidean.
Aurretik jakinarazia zutenez, Amaiera berri bat izanen da 28. Hatortxu Rocken. Sarrerak gaurtik eros daitezke, webgunean. Izatez, eskaintza berezi bat iragarri dute antolatzaileek: lehenbiziko bostehun sarrerak merkeagoak dira.
