Euskarazko zortzi lan erakutsiko dituzte Donostiako Poltsiko Antzerkiaren Jaialdian

Bakarrizketak, magia, umorea eta antzerkia uztartzen ditu Donostiako Poltsiko Antzerkiaren Jaialdiak. Aurtengoa 35. aldia da, eta Donostia Kulturak antolatzen du hiriko kultur etxeen laguntzarekin, hain zuzen, helburu bera dutelako: kultura «auzoetara eta jendearengana» hurbiltzea. Antolatzaileek ohar bidez adierazi dutenez, oraingo honetan ere «formatu txikiko ikuskizunen askotariko programazioa» osatu dute; egitarau horretan, zortzi ikuskizun izango dira euskaraz. Hala, maiatzaren 7tik 24ra bitarte, hiria beteko dute 30 emanaldik; auzo desberdinetan egingo dituzte, eta sarrerak doakoak izango dira. Jaialdiaren amaiera festa, berriz, maiatzaren 22an izango da, Convent Gardeneko kriptan, 19:00etan. Bertan, festa girotuko dute Demode Quartet eta Los Gandules musika taldeek. 

Jaialdiak badu berezitasun bat: «antzerkigintzan ohikoak ez diren» agertokietan egiten dituzte saioak. Esaterako, lokaletan, tabernetan eta zahar etxeetan jarri dituzte hitzorduak. Guztira hamazazpi konpainiak hartuko dute parte, eta denera 30 saio egongo dira ikusgai. Antolatzaileek esan dutenez, «bi hizkuntza ofizialen arteko oreka» mantendu nahi izan dute, baita «emakumeen parte hartzea» sustatu ere. Hala, hamazazpi emanaldietatik zortzi euskaraz izango dira, eta bederatzi gaztelaniaz. Bestalde, zortzi konpainia emakumeek osatuak dira; sei, gizonek osatuak, eta mistoak dira gainerako hirurak.

Antzerkia «hiriko auzo guztietara» zabaldu nahi dute: «ohiko jarraitzaileengana» heldu, baina baita «tradiziozko espazio eszenikoetara joateko ohiturarik ez duen publikoarengana» ere. Hortaz, hiriko 27 gunetan egingo dituzte ikuskizunak. Lehenbizikoak maiatzaren 7an egingo dituzte, eta hiru izango dira guztira; horietatik bat, euskaraz: Tessa Andonegiren eta Ainhoa Aierberen Euskal musikarekin, kontuz! emanaldia, Añorgan, 19:00etan.

Euskarazkoa indartzeko

Iaz iragarri zuten Poltsiko Sorkuntza deialdiko proiektu irabazlea: Idoia Garzesen eta Mikel Martinezen Taxi. Deialdiaren helburua «formatu txikiko ikuskizunen esparruko euskarazko eskaintza» indartzea da, eta Donostia Kulturak antolatzen du, hiriko Euskara zerbitzuarekin eta Euskal Herriko Antzerkizale Elkartearekin elkarlanean. Antzezlana egun eta toki hauetan ikusi ahalko da: maiatzaren 15ean, Antigua auzoan; 17an, Erdialdean; 21ean, Grosen, eta 24an, Erdialdean.

Tessa Andonegiren eta Ainhoa Aierberen Euskal musikarekin, kontuz! proiektuak ere saria jaso zuen, bigarrena. Bikarrizketa bat ondu dute, eta «ikuspegi kritikoz, suminduraz eta feminismotik» aztertuko dituzte «txikitatik» entzun dituzten doinuak. Ikusleek lan horretaz gozatu ahalko dute maiatzaren 7an, Añorgan; 9an, Amaran; 21ean, Antiguan, eta 23an, Loiolan.