Itzultzea erabaki dute. Exkixu taldeak lorratz nabarmena utzi zuen 1990eko hamarkadako euskal musikagintzan. 1991n hasi zuten ibilbidea, eta 1997an amaitu, tartean estudioko bi disko grabatu eta ehunka kontzertu eman ostean. Rock doinuak eta ordura arte folkaren esparruari lotuta egon ohi ziren tresnak uztartzeko modua izan zen haien bereizgarri nagusietako bat. Sorginen leizean eta Amaiur abestiek arrakasta handia izan zuten, esaterako, eta Benito Lertxundiren Loretxoa abestiaren bertsioa ere erruz zabaldu zen. Hain zuzen ere, kanta hori izan zen grabatu zuten azkena, eta 29 urteko isiltasunaren ostean, oholtzara bueltatuko dira orain. Kontzertu bakarra iragarri dute oraingoz. Hurrengo urteko apirilaren 17an emango dute, Bilbo Arenan, baina,iradoki dutenez, baliteke taldearen bizialdi berriaren lehen urratsa baino ez izatea. Edo hori da esperantza behintzat. Taldea berriz ere martxan jartzea baita kideen asmoa. «Airean geratu zen esperientzia hori berriz hartu nahi dugu».
Bihar jarriko dituzte salgai sarrerak, 10:00etan, exkixu.eus eta haziberri.eus webguneetan.
1990ean sortu zen Exkixu, Gernika-Lumon (Bizkaia), eta, gerora hainbat kide batuko zitzaizkien arren, laukote bat izan zuen muinean: Alex Sardui abeslaria, Iñigo Ibarretxe albokaria, Jon Mikel Arronategi baxu jotzailea eta Josu Artetxe bateria jotzailea. Esteban Mediavilla gitarra jotzailea ere batu zitzaien gero, eta taldearekin bat egin zuten hurrengo urteetan Ritxar Cuevasek, hil berri den Igor Arzuagak, eta Unai Ormaetxea bertsolariak ere. Hitz egileen sare zabala ere izan zuten, eta, besteak beste, Asier Serranok, Unai Iturriagak, Igor Elortzak eta Joseba Sarrionandiak idatzitakoak kantatu zituzten.
Jatorrizko kideetatik, Alex Sardui eta Iñigo Ibarretxe oholtzaratuko dira taldearen bigarren aldian, eta haiekin batera arituko dira Ken Zazpin aritutako Beñat Serna eta Jon Fresko bateria jotzailea, bai eta Gatibun ibilitako Ekain Alzola ere, eta Jon Eguskiza musikariak joko du trikitia.
Taldeak 1993an kaleratu zuen lehen diskoa, Exkixu (Gor), eta handik bi urtera heldu zen estudioko bigarren lan luzea: Gaua heldu orduko. 1997an eman zuten azken kontzertua, baina gerora euskal musikan eragin sakona izango zuten beste bi talderen ernamuina ere izan zen Exkixu.
Exkixu desegin ostean, bertan aritutako kideek Ken Zazpi eta Gatibu sortu zituzten. Ken Zazpik 2013an grabatu zuen azken diskoa, eta Gatibuk, berriz, iazko abenduan eman zuen azken kontzertua, 25 urteko ibilbidea borobiltzeko. Eta agur horien ostean heldu da Exkixuren piztualdia.
[Informazioa osatzen]
