Last Tour International promotoreak azaldu duenez, aurrerantzean ez dute irailean egiten den Donostia Festibala antolatuko. Noticias de Gipuzkoa egunkariak jakinarazi du berria, eta nabarmendu du enpresa horrek ez duela azaldu zergatik erabaki duen hori, ezta asmorik ote duen ere etorkizunean jaialdia berriz antolatzeko.
Ikusi gehiago:La Femme, Anari, Belako eta beste, Donostiako Boga Boga musika jaialdiaren lehenbiziko aldian
Donostia Festibala zen Last Tourrek Gipuzkoan antolatzen zuen jaialdirik handiena –2019an 18.000 ikusle inguru bildu zituen–, eta gaur egun hipodromoan egiten zen, baina lehenengo aldia, 2011koa, belodromoan izan zen, Kutxa Kultur Festibala izenpean. Sergio Cruzadok sortu zuen jaialdia, eta lehen aldi hartan aukera izan zen, besteak beste, Primal Scream, We Are Standard, Thee Brandy Hips eta Fanfarlo taldeen kontzertuak ikusteko.
