Hamar artista eta talderen lana aitortu dute Musika Bulegoaren VI. Sarietan

Euskal Herriko Musika Bulegoa elkarteak Barakaldoko BEC erakustazokan eginiko galan banatu zituen seigarrenez bere sariak, atzo arratsaldean, berriro ere aurrez aurre. Sektoreko ehun profesional inguru bildu ziren ekitaldian, baita instituzioetako ordezkariak ere, eta sarituek horien guztien aurrean jaso zituzten garaikurrak. Ehun proposamen baino gehiagoren artetik, hamar artista eta talderen ibilbideari egin dio aitortza Musika Bulegoak: Olatz Salvador, Chill Mafia, Gaur, Ether Ensemble, Maite Larburu, Ramon Lazkano, Verde Prato, Amak, Trio Zukan eta Motxila 21 taldeak saritu ditu aurten.

Elkarteak azaldu duenez, euskal musikaren sektoreari balioa ematea, artisten lanak sustatzea, haien lanak ezagutarazi eta bultzatzea, eta erakusleiho izatea dute helburu sariek. Nabarmendu dutenez, aurtengo proposamenen erdietan baino gehiagotan emakumeak izan dira buru. Eta horien guztien artetik, sektoreko zortzi profesionalek osatutako epaimahaiak saritutako artista eta taldeetako zortzi hautatu zituen. Halaber, Zukan Triok Etxepare institutuaren Musika saria eskuratu zuen, euskal musika Euskal Herriko mugetatik harago zabaltzeko egindako lanagatik. Bederatzi sarituek 2.000 euro eta Fernando Mikelarena artistaren eskultura jaso zituzten, eta hainbatek zuzeneko emanaldia ere egin zuten atzoko ekitaldian.

Azkenik, Musika Bulegoko zuzendaritza batzordeak sari berezia eman zion Motxila 21 taldeari, «bultzatzen duen elkartasuna eta musikarien arteko elkarlana eredugarria delako». Mikelarenaren eskultura jaso zuen talde horrek ere.

Musika Bulegoak gogorarazi zuen iazko urtea «bereziki zaila» izan zela sektorearentzat, baina baita «oparoa» ere euskal musikarentzat.