Aurten ere, Iruñeko O-ko Andre Maria plazan txosnak jarriko ditu Herri Sanferminak plataformak. «Egitarau zabala eta askotarikoa izan dadin saiatu gara. Kontzertuetatik harago eskaintza askotarikoagoa lortu nahi dugulako», azaldu dute, gaur eman duten prentsaurrekoan.
Bazkariak, antzerkiak, olinpiadak, pilota txapelketa eta bertso saioak izango dira aurtengo sanferminetan. Asmoa arratsaldeko egitaraua indartzea dela adierazi dute. Horretarako, hainbat kontzertu antolatu dituzte: uztailaren 6an Los Tirris, Skabidean, The Trikiteens eta DJ Pibikens ariko dira; hurrengo egunean, La Bahia eta Zaunka, besteak beste; uztailaren 8an, Apotheke eta Borlaren doinuek beteko dute plaza; uztailaren 9an, Irunyard eta Perlata izango dira oholtzan, eta 10ean, Malakias eta DK Kabia, besteak beste. Asteburuan Streetwise, DJ Pezon, Islada, Zazu Rumba eta Aingura izango dira, eskaintza zabal baten artean; eta, amaitzeko, uztailaren 14an Katu eta DJ Barbarie izango dira.
Oholtza gainean emakumeen presentzia indartzeko saiakera egin dutela adierazi dute plataformako kideek, baita euskara lehen lerroan jartzekoa ere. Kontzertuez gain, egunero antolatu dituzte arratsalde antitaurinoak, zezen plazatik kanpo beste aukera kultural bat eskaintzeko asmoz. Iaz bezala, herri txupinazoa jaurtiko dute uztailaren 6an, O-ko Andre Maria plazatik, eta aurten kale saltzaile batek jaurtiko du.
Erdigunetik at
Iazko emaitzarekin «pozik» geratu zirela esan du Irune Azkoiti Herri Sanferminak plataformako kideak: «Aurten gogotsu hasi gara lanean. Balorazio positiboa egin genuen joan den urtean, ikusirik txosnak beteta zeudela. Horregatik, espazioa irekitzeko apustua egin dugu». Txosnak Iruñeko erdigunean egotea zen asmoa, eta Iruñeko Udalarekin hitz egin zuten bi txosnagune jartzeko: bata O-ko Andre Maria plazan, eta bestea Baratxurien plazan, 2016tik 2019ra bitartean han egin baitziren kontzertuak. Ezezkoa jaso zuten, osasun zerbitzuen gunea kokatu behar dutelako bertan, iaz bezala. Azkoiti: «Herri Sanferminetakook aldarrikatu nahi duguna da ezinbestekoa dela erdigunean egotea eta herri mugimenduak aukera izatea bere espazioa handitzeko».
