Xabier Mendiguren Elizegik (Beasain, Gipuzkoa, 1964) erretiroaren bidea hartuko du, eta, horrenbestez, Elkar argitaletxeko editore izateari utziko dio datozen hilabeteetan. Gaur bertan Morlans bere nobela berria aurkeztu du Mendiguren Elizegik Donostian, eta han eman du albistearen berri. Ondoan izan du aurrerantzean argitaletxeko editore lanetan ariko den lankidea: Itzea Urkizu Arsuaga (Orio, Gipuzkoa, 1988).
Julen Agirrezabalaga Elkar-eko ordezkariak azaldu du Mendigurenen erretiratzea ez dela berehalakoa izango, baina adierazi du haren dedikazioa murritzagoa izango dela hemendik aurrera, «behin betiko erretiroa hartu arte». Agirrezabalagak esker hitzak izan ditu Mendigurenentzat, eta haren ekarpena nabarmendu du. «Ekarpen handia egin dio argitaletxeari, baina baita euskal kulturari ere orokorrean».
Urkizu Elkar argitaletxean aritu da orain arte ere. Elkar-Hizkuntzak atalean hasi zen lanean, eta gerora Ttarttalo argitaletxearen editorea izan da. «Erronka handia jarri diogu aurrean, eta ilusioz eutsi dio horri. Eta aski prestatua dagoela erakutsi digu orain arte». Halaber, belaunaldi berri bateko kidea izanik, «aire berria» ekarriko duela gaineratu du Agirrezabalagak.
