2021eko abenduan aurkeztu zuen Bizkaiko Lukiek musika taldeak bere bigarren lan luzea: #2. Diskoaren aurkezpen kontzertuei ekin zietenetik, taldeak 106 emanaldi egin ditu osotara –joan den asteartekoa izan zen azkena, Legorretan (Gipuzkoa)–, eta, orain, kideek jakinarazi dute «gelditu» eginen direla. Etenak noiz arte iraunen duen argitu gabe. «Besarkada handi bat oholtza elkarbanatu dugun talde guztiei. Gu gelditu egiten gara (...)», adierazi dute ohar batean.
Gero arte!👋ðŸ¼ðŸ˜˜ pic.twitter.com/tvsJpsNW9R
— Lukiek (@Lukiektaldea) November 3, 2023
Christian Rodriguez (bateria), Josu Ximun Billelabeitia (ahotsa, gitarrak) eta Antton Goikoetxea (baxua) kideak elkarrekin ageri diren argazki bat zabalduz iragarri dute etena, «eskerrik asko denoi» idatziz irudiaren gainean. Izan ere, esker mezuz jositako testua plazaratu dute: «Kaixo! Argitalpen honen bidez, eskerrak eman gure deutseguz bira honetan eskainitako 106 kontzertuetako batera /(edo gehiagotara) joan zarion guztioi. Baita aretoetako, jaialdietako, gaztetxeetako, jai batzordeetako, kultur guneetako eta gure musika jotzeko lekutxue egin deuskuen beste inguru batzuetako jendeari bere bai».
Zaleen zorionerako, oharraren bukaeran utzi dute esperantza pilula txiki bat. «Orain, gero arte diogu, baina itzuliko gara. AMZ!».
