Amaitu da Michel Portal musikari eta konpositorearen emari oparoa. Baionan 1935ean jaiotako musikaria Parisen hil da 90 urte zituela; han bizi zen azken urteetan. Klarinete eta saxo jotzailea, besteak beste, Europako free jazz musika estiloaren sortzaileetako bat izan zen, baina jazz klasikoan ere ibilbide aberatsa egin du.
Ikusi gehiago
2019. urtean, Baionako udalak haren izena jarri zion hiriko antzokiari, eta, horri lotuta, hiru kontzertu jarraian eskaini zituen bertan. Donostiako Jazzaldiaren aitortza ere jaso zuen 2018. urtean.
Genero eta instrumentu ugaritan nabarmendu izan da Portal, eta free jazz estiloan erreferente izateaz gain, ospetsua da zinemarako eta telebistarako egindako konpositore lanengatik. Euskal folklorearekin ere harremana izandakoa zen, eta 1990ean Antxon Ezeizaren Ke arteko egunak filmaren musika idatzi zuen.
