Miren Artetxek irabazi du Euskal Herriko Bertsolari Txapelketako lehendabiziko faseko lehen saioa, Hazparnekoa (Lapurdi), orotara 709 puntu zakuratuta. Horrek erran nahi du, beraz, Eibarren (Gipuzkoa) kantatuko duela hurrena, urriaren 31n, saioa irabazi izanak automatikoki bigarren fasean kantatzeko txartela eman baitio.
Gaur arratsaldean kantatu duten gainerako bortzek, berriz, zain geratu beharko dute, lehen fasea bukatu arte ez baita jakinen zer bertsolarik segituko duen aitzinera. Maddi Ane Txoperenak egin du gaur bigarren, 691 puntu eskuratuta, eta haren gibeletik sailkatu dira, hurrenez hurren, Xabat Galletebeitia (672 puntu), Unai Anda (636,5 puntu), Peru Abarrategi (631 puntu) eta Eki Mateorena (589,5 puntu).
Zazpi saio ditu lehendabiziko faseak: Euskal Herriko lurralde bakoitzeko bat. 42 bertsolarik kantatuko dute, eta hamazazpi bertzerik ez dira sailkatuko hurrengo eskailerara. Oraingoz, Altsasu (Nafarroa) da hurrengo geltokia, eta bertze sei bertsolarik kantatu beharko dute han.
Hamazazpi horiez gain, bigarren faseko lehendabiziko bueltan zazpi bertsolari egonen dira esperoan: 2022ko txapelketako finalistak, txapelduna salbu.
HAZPARNEKO SAIOKO SAILKAPENA
- Miren Artetxe Sarasola (709 puntu)
- Maddi Ane Txoperena Iribarren (691 puntu)
- Xabat Galletebeitia Abaroa (672 puntu)
- Unai Anda Delika (636,5 puntu)
- Peru Abarrategi Sarrionandia (631 puntu)
- Eki Mateorena Zozaia (589,5 puntu)
