Palestinako genozidioa, Bangladeshko klima larrialdia eta landa eremuko trans identitateak pantailaratuko ditu Donostiako Giza Eskubideen Zinemaldiak

«Genozidioa hasi zenean, denak jo zuen behea. Gure herria suntsitzen ari ziren, eta gure historiaren garai ilun bati buruzko film bat egiten saiatu ginen, inoiz bizi izan dugun garairik ilunenetako bat biziko genuela jakin aurretik». Egoera are gehiago gaiztotuko zela aurreikusi ezinik ekin zion Annemarie Jacir zuzendariak Palestine 36 zinema proiektua ehuntzeari, 2023an. Ordurako, inguruari begiratu besterik ez zuen sorterria hamarkadetako erasoaldi baten pean irudikatu ahal izateko, baina gerora, urriaren 7tik aitzinera, eta filmaren ekoizpenean murgilduta dagoeneko, etengabean pilatu zitzaizkion, dioenez, «oinazea maitasun ekintza batera iraultzeko» motiboak. 1936an piztutako matxinada arabiarra kontatu nahia izan zuen filma abiarazteko bulkada Jacirrek, eta 2025ean bete zuen xedea azkenerako, oztopoak oztopo. Ordea, bidean ezinbestean aldatu zen lanaren anbizioa, hark aitortu bezala: «Film hau ofrenda bihurtu da». Eta eskaintza hori han-hemenka bistaratu nahia du orain bultzada, aurrera begira. Apirilaren 23an, Euskal Herrian eginen du geldialdia horretarako. Film horrek abiaraziko du Donostiako Giza Eskubideen 23. Zinemaldia. 

Apirilaren 23an hasi, eta hilaren 30era arte eginen dute zinema festibala aurten. Besteak beste, Viktoria Eugenian, Antzoki Zaharrean eta Tabakaleran emanen dituzte filmak. Antolatzaileen esanetan, datozen asteetan emanen dute argitara egitarau osoa. Edonola ere, hasiak dira zenbait datu aurreratzen. 

Askotariko gatazka eta oinazeak

Aurtengo aldian Sail Ofizialean jasotako zortzi film luzeren berri eman dute. Zinemaldiak askotariko gai sozialak pantailaratuko ditu haien bitartez. Horretan egin dute azpimarra, besteak beste, film zerrenda argitaratzearekin batera. «Jaialdiak hainbat ardatz izango ditu, adibidez, emakumeek erlijioetan duten rola, Bangladeshko klima larrialdia —munduko beste eskualde askotan gertatzen ari denaren adibide gisa— eta ehungintzaren industriako lan prekaritatearen feminizazioa». 

Zehazki, hauek dira, oraingoz, antolatzaileek sail horretarako iragarritako filmak: À bras-le-corps (Marie-Elsa Sgualdo, Suitza-Belgika-Frantzia), Black Water (Natxo Leuza, Euskal Herria), The Disappearance of Josef Mangele (Kirill Serebrennikov, Frantzia-Alemania), Girls & Gods (Arash T. Riahi, Verena Soltiz, Austria-Suitza), Iván & Hadoum (Ian de la Rosa, Espainia-Alemania-Belgika), Made in EU (Stephan Komandarev, Bulgaria-Alemania-Txekiako Errepublika), Promis le ciel (Erige Sehiri, Frantzia-Tunisia-Qatar) eta Sucia (Barbara Mestanza, Marc Pujolar, Espainia). 

Tabakalerak hartuko du atzera ere Zinema eta memoria zikloa. Hiru film iragarri dituzte: Tamara Stepanyanen Mes fantômes arméniens, Ezequiel Salinas eta Ramiro Sonziniren La noche está marchándose ya eta Bipuljit Basuren Redlight to Limelight.