Aiaraldeko Euskalgintzaren Kontseiluak eta Arabako Foru Aldundiak Zubi egitasmoaren eta haren baliabideen berri emango dute urriaren 26an, 18:00etan, Izaskun Arrue kulturgunean, eta euskaraz, arabieraz eta amazigeraz egindako hiru hizkuntzatako hiztegia aurkeztuko dute. Proposamenaren helburu nagusia zera da, beste kultura eta hizkuntza batzuetatik datozen herritarrei euskarara gerturatzeko bidea «erraztea».
Egitasmoa Aiaraldean aurretik landutako «esperientzian» oinarritzen da. Eskualdeko eragileen arteko lankidetzari esker, euskararen zabalpena eta kulturen arteko harremana «uztartzeko bideak» landu dira. Aurretik egindako lanean oinarriturik, Arabako Foru Aldundiko Euskara sailak eta Kulturartekotasun Zerbitzuak bat egin dute Aiaraldeko Euskalgintza Kontseiluarekin proiektua bultzatzeko.
Zubi egitasmoak Arabako gaur egungo «errealitate soziolinguistikoari» erantzuten dio. Lurraldean jatorri eta hizkuntza ugari elkarrekin bizi direnez, egitasmoak «erronka eta aukera berriak» eskaintzen ditu euskararen erabilera sustatzeko. Hiztegiaz gain, metodologiak ikus-entzunezko materialak eta bestelako baliabideak ere biltzen ditu.
Euskararekiko konfiantza eraikitzea
Hiztegiaren bitartez, euskara eguneroko eremuetan lantzeko eta hizkuntzarekin «harreman positiboak» sortzeko aukerak bultzatu nahi dira. Modu horretan, askotariko herritarrak zein taldeak elkartzeko, elkarbizitza hobetzeko eta harremanak sendotzeko «lotura hizkuntza» bihurtu nahi dute.
Ekinbideak arreta berezia jartzen du harrera prozesuetan, hezkuntza inguruneetan, elkarteetan eta komunitatearen eguneroko harremanetan. Hiztegiaren helburua ez da soilik euskarazko hitzak edo esamoldeak ezagutaraztea, baizik eta euskara erabiltzeko «konfiantza eraikitzen» laguntzea.
