Iragan den astean Labrazako (Oion) parke eolikoak oihartzuna eragin zuen Araban. Bost aktibistak beren burua kateatu zuten bertako haize errota batean, gizarteko sektore batzuetan energia berriztagarrien inguruko proiektu eta azpiegiturek eragiten duten arbuioaren erakusgarri. Egitasmoen zerrendak, ordea, handitu eta handitu jarraitzen du, eta Aiarako Murga herrian eraikitzekoak diren bateria finkoen biltegia izan da aurrera ateratzen azkena. Izan ere, Euskal Herriko Aldizkari Ofizialak gaur iragarri du Eusko Jaurlaritzak aurretiazko baimena eman diola PB Navegantes 31 izeneko proiektuari.
Ikusi gehiago
Sevillako (Espainia) Lemon Tree Power enpresa da bateria biltegiratzeko gune horren bultzatzailea. 30 megawatteko potentzia biltegiratzeko gaitasuna izango du guneak, eta 23 milioi euroren aurrekontua du. BESS edo bateria bidez energia biltegiratzeko sistema finkoak funtsezko osagai bilakatu dira energia berriztagarrien zabalkuntzan. Izan ere, energia sorkuntza altua denean, soberakina biltegiratzeko modua ematen dute, eta haietan gordetako energia funtsezkoa da sorkuntza baxua denean eskaintza orekatzeko. Hain zuzen ere, berriztagarrien energia ekoizpenaren bat-bateko jaitsiera izan zen, hipotesi nagusien arabera, iragan den urteko itzalaldi handiaren kausetako bat. Bateria biltzeko guneek horrelako gertaerak eragoztea dute helburu.
