Abisu horia aktibatu du Euskalmetek, sute arriskua dela eta, eta Arabako Foru Aldundiak kontu bereziarekin ibiltzeko eskatu zuen atzo, abisu horrengatik. Bada, sute arrisku hori gaur goizaldean egikaritu da, tximista batek Zalduondon (Araba) jo eta sua piztu baitzuen. Goizaldeko hirurak aldera jazo zen ezbeharra.
Biztanlerik gabeko gune batean piztu da sutea, eta, hortaz, momentuz ez da inor ebakuatu behar izan, baina suhiltzaileek sutea itzaltzeko lanetan jarraitzen dute. Arabako suhiltzaileen zerbitzuak azaldu duenez, inguru menditsuan piztu da sutea. Lurralde malkartsua da, eta zaila da bertara iristea. Horrek zailtzen ditu sua itzaltzeko lanak.
Ikusi gehiago
Aurreko larunbatean ere izan ziren inguru hartan suhiltzaileak, orduko hartan ere oinaztuak sua piztu zuelako. Egunean bertan lortu zuten orduko sutea itzaltzea, baina gaurkoa itzaltzeko zailtasun handiagoak dituzte, bistan denez. Aguraingo eta Iruña Okako suhiltzaileak bertaratu dira, eta helikoptero bat ari da itzaltze lanetan laguntzen.
Mendabiako sutea, kontrolpean
Nafarroan ere piztu da sute bat goizaldean, Mendabian, Errioxarekiko mugan. Sutea landaretza gune batean sortu zen, NA-134 errepidearen ondoan, gauerdi aldera. Goizaldeko hirurak aldera, ordea, kontrolaturik zegoen jada sutea, Nafarroako suhiltzaileek jakitera eman dutenez.
Suteak ez du kalte pertsonalik eragin. Suhiltzaileak oraindik sutearen eremuan dira, lurraren freskatze lanak burutzen, sutea berriro pitz ez dadin. Nafarroako suhiltzaileek Errioxako lankideen laguntza jaso dute sutea itzaltzeko.
