Espainiako Trantsizio Energetikorako eta Erronka Demografikorako Ministerioak behin betiko ukatu dio baimen administratiboa Statkraft enpresa norvegiarrari Itsaraz parke eolikoa gauzatzeko. Ingurumen inpaktu kaltegarria eta sarbide baimenen iraungitzea izan dira proiektua baztertzeko arrazoi nagusiak.
Statkraftek sustatutako egitasmoak 60,4 megawatteko potentzia instalatua aurreikusten zuen, zortzi aerosorgailuren bidez. Horietatik zazpi Aramaioko udalerrian (Araba) kokatzea zen asmoa, eta zortzigarrena Eskoriatzan (Gipuzkoa). Bestalde, energia ekoizpena sare orokorrera konektatzeko azpiegiturak Aramaio, Arrasate, Atxondo, Elorrio eta Abadiño zeharkatuko zituen.
50 megawattetik gorako potentzia izanik, Espainiako Gobernuaren esku zegoen proiektuaren tramitazioa. Ministerioaren ingurumen inpaktuaren adierazpenak ondorioztatu zuen proiektuak «inpaktu kaltegarri nabarmenak» eragingo lituzkeela babestutako eta mehatxatutako hegazti espezieetan. Gainera, Statkraftek aurkeztutako prebentzio, zuzenketa eta konpentsazio neurriak ez zituen nahikotzat jo ingurumenaren babesa bermatzeko.
Proiektuak hasieratik piztu zuen erresistentzia sozial eta instituzional handia. Urtarrilean jaso zuen ministerioaren ingurumen ebaluazio negatiboa, eta, nahiz eta Statkraftek ondoren hainbat aldaketa tekniko aurkeztu zituen, ez dituzte nahikotzat jo ingurumen ondorio kaltegarriak arintzeko. Horren ondorioz, ministerioak behin betiko atzera bota du proiektua.
