Bihar, abuztuak 4, Gasteizko jaiak hasiko dira Andre Maria Zuriaren plazan, Zeledonen jaitsierarekin. Urteroko ekitaldi garrantzitsu horren harira, EH Bilduk gonbita egin die hiriko zenbait gizarte eragileri ekitaldia San Migel balkoitik ikusteko: Salburuko Harrera Sareari, Martxoak 3 elkarteari, Sareri eta Ikusguneri. Aurretik, Elkarrekin Ahal Dugu-k esana zuen Arabako esku hartze sozialeko langileei egingo ziela tokia balkoian.
Ikusi gehiago
Gonbidatutako kolektiboek euren «jaiaren erdigunera» eraman ahalko dituzte aldarrikapenak. Horren bitartez, koalizioak «jai irekiak eta integratzaileak» sustatu nahi ditu, guztien «gozamena» bermatzeko. «Eragile sozialen bidezko aldarrikapenak ez dira ahaztu behar», adierazi du EH Bilduk.
Jaien hasieraren atarian, Rocio Vitero Bilduko bozeramaileak dei egin du «errespetuan eta bizikidetzan» oinarritutako ospakizunak izateko. Viterok azpimarratu du aisialdi guneetan indarkeria matxistarik eta LGTBIfobikorik ez izatea bermatu behar dela, herritar guztiek ospakizunak «aske» gozatu ahal izateko.
