Arabako esku hartze sozialeko langileek hilabeteak daramatzate lan gatazka gogor batean murgilduta. Beren soldatak sektoreko publikoko langileenekin berdintzeko eskatzen dute, eta greba egun ugari egin dituzte urte guztian eskaera horren alde. Orain, Gasteizko jaietako txupinazoaren lehen lerrora eramango dute aldarri hori, Elkarrekin Ahal Dugu koalizioaren udal taldeak Andre Maria Zuriko balkoian zegozkien lekuak laga baitizkie sektoreko langileei.
Elkarrekin Ahal Dugu-ko iturriek adierazi dutenez, «langileen aldarriak ikusaraztea» dute helburu ekintza horretan, baita festak «gizarte zibil antolatuari hurbiltzea» ere. Esku hartze sozialeko langileen eskaerekin bat egin du koalizioak, eta haien baldintzak «pixkanaka» sektore publikoko langileenekin berdintzea nahi dute. Hortaz, alderdiko zinegotziak langileekin batera agertuko dira abuztuaren 4an, Zeledonen jaitsiera egunean, eta jaia aldarriarekin nahastuko da, balkoitik bertatik hasita.
