Gasteizko taxi gidari batzuek lanuzte partzialak egingo dituzte uztailaren 25ean eta 26an, udalak taxi zerbitzurako guardia sistema berria indarrean jarriko duen egunetan. Aidttax elkarteak deitu ditu mobilizazioak, eta derrigorrezko guardien aurka dauden lizentziadunei egin die bat egiteko deia.
Elkartearen arabera, lanuzteek udalaren guardia txandetan sartuta dauden lizentziei baino ez diete eragingo, eta taxi zerbitzua bermatuta egongo da bi egunetan. Taxilarien iritziz, zerbitzua berma daiteke profesionalek beren kabuz antolatuta ere, udal gobernuak txandak inposatu gabe; horregatik, dekretua baliogabetzeko bide judiziala ere abiatu dutela jakinarazi dute.
Taxilarien elkartearen iritziz, guardien dekretua «justifikaziorik gabea, neurriz kanpokoa eta profesionalen eskubideen aurkakoa» da. Elkarteak salatu du udalak autonomoen eta enpresa txikien lan antolaketan esku hartu duela, eta administrazioak baztertu egin dituela alegazio garaian aurkeztutako bestelako proposamenak. Era berean, iragarri du mobilizazioetan parte hartuko duten taxilariei laguntza juridikoa eskainiko diela.
Liskarraren jatorria
Liskarraren jatorria Gasteizko Udalak atzo onartu zuen guardien dekretuan dago. Araudi berrian gutxieneko taxi kopuru bat ezarri dute eskaririk handieneko ordu tarteetan: gutxienez 50 taxi larunbat gauetan eta jaiegun bezperetan, 00:00etatik 08:00etara; 35 taxi igandeetan, maiatzetik urrira bitartean, 13:00etatik 19:00etara; eta egokitutako bi taxi eguneko 24 orduetan.
Udalaren arabera, neurria beharrezkoa zen azken urteetan taxi eskasiagatik jasotako kexei erantzuteko. Azken bi urteetan 411 erreklamazio jaso ditu udalak, batez ere eskari handiko garaian taxirik ez zegoelako. Halaber, gobernu taldeak defendatu du ia bi urteko elkarrizketa prozesuaren ondoren onartu duela dekretua, sektoreak aurkeztutako alegazio guztiak aztertu eta zenbaitetan aldaketak eginda.
Guardien araudia behin betiko onartu ondoren, udal gobernuak iragarri du beste hogei taxi lizentzia sortzeko izapideak ere abiatuko dituela irailean. Gaur egun Gasteizen 194 lizentzia daude, duela hogei urte adina ia, eta udalaren ustez handitu egin behar da eskaintza, hiria handitu egin delako bai biztanlez eta bai eremuz.
Guardien dekretuak, beraz, udalaren eta taxi sektoreko ordezkaritza baten arteko gatazka bizitu du. Udalak zerbitzu publikoa indartzeko tresnatzat jotzen du araudia; Aidttaxi, berriz, taxilariei lana antolatzeko beste modu bat inposatzen dien neurria iruditzen zaio, eta horren aurka mobilizatuko dela iragarri du.
