Martxoaren 3ko biktimen elkarteak eta SF78 Gogoan taldeak asteartean eskatu zioten Espainiari publikoki aitortzeko Martxoaren 3ko eta 1978ko Sanferminetako sarraskietako biktimak. Orain, Gasteizko Udaleko gehiengoa batu da eskakizun horretara: Espainiako Gobernuari eskatu diote bi gertakarietako sarraskien «erantzukizun nagusia eta zuzena» aitortu dezala.
Udaleko osoko bilkurak gaur goizean onartu du mozioa, EAJ, EH Bildu eta Elkarrekin taldeen babesarekin; PSE-EE eta PP abstenitu egin dira. Mozioan zehaztu dute Pedro Sanchez presidenteak «maila gorenean» hartu behar duela erantzukizun hori.
Era berean, testuan «erakunde arduradunak» exijitzen dira ekintza «errealak eta definitiboak» hartzeko, estatuaren indarkeriaren biktimen eskubideari buruzko egia bermatzeko, eta, horrela, justizia eta erreparazioa lortzeko, berriro halako gertaerak errepikatu ez daitezen.
