Urtarrilean zehar erakunde eta elkarte ezberdinek 1976ko martxoaren 3ko sarraskia gogoratzeko ekitaldiak iragarri dituzte, bakoitzak bere aldetik. Oraingo honetan, ordea, sindikatu nagusiek aurtengo martxoaren 3rako egitarau bateratua iragarri dute, Martxoak 3 elkartearekin batera. Arratsaldean hildako langileei eskainitako monumentuan egiten den lore eskaintza bere horretan mantenduko da, baina eguna berritasun nabarmen batekin dator, Zaramagatik abiatu ohi den manifestazioa Katedral Berriaren eta Andra Mari Zuriaren plazaren artean egingo den «herri mobilizazio handi» batek ordezkatuko baitu.
Gasteizen egindako agerraldian, LABeko koordinatzaile nagusi Garbiñe Aranburuk, ELAko idazkari nagusi Mitxel Lakuntzak, ESK-ko kide Jabier Saenzek eta Steilaseko ordezkari Oihana Saez de Castillok hartu dute parte. Alboan izan dute Jose Luis Martinez Ocio, Martxoak 3 elkarteko lehendakaria. Zaramagako San Frantzisko elizaren ondoan bildu dira, biktimen aurpegiak irudikatzen dituen hormaren aurrean, eta sindikatuetako eta elkarteko kideek osaturiko kartel hesia izan dute atzean zaindari deklarazioak egiten zituzten bitartean.
Borroka bat eta bakarra
Orain arte egin bezala, Martxoaren 3ko gertakariak gaur egungo langile borrokarekin lotu dituzte sindikatuetako ordezkariek. Batez ere, Euskal Herriko pentsionisten borroka eta martxoaren 17an gutxieneko soldata propioa exijitzeko Hego Euskal Herrian egingo den greba orokorra aipatu dituzte. Aurtengo martxoaren 3a «mobilizazio ziklo zabal» baten testuinguruan kokatu dute, aipaturiko greba orokorra edo martxoaren 8ko mobilizazio feministak tarteko.
Irakurketa horrekin bat, Martxoaren 3aren 50. urteurrenean, «memoria historikoa munduko txoko guztietako desberdintasunari, indarkeriari eta injustiziari aurre egiteko tresna ere badela» aldarrikatu dute ordezkariek. Aurtengo mobilizazioetarako hautatu duten leloa interpretazio horrekin bat datorrela ere azaldu dute. Izan ere, M3emoria. Antolakuntza. Borroka. lelopean mobilizatuko dira sindikatuak egun horretan: «M3moria. Egia, justizia erreparazioa eta ez errepikatzeko bermeak exijitzeko. Indar kolektiboa eraikitzeko Antolaketa. Eskubideak konkistatzeko Borroka».
Ezohiko egitaraua
Bestalde, urteurren sinbolikoari beharrezko garrantzia emateko, eguneko mobilizazio tradizionaletan aldaketa nabarmena iragarri dute. Arratsaldeko bostetan hildako langileei eskainitako monolitoaren aurrean egiten den lore eskaintza bere horretan mantenduko da, inguruan ikusten den anabasak ekitaldi hori posible ote den aurreikustea zailtzen badu ere. Izan ere, obretan dago Vicente Manterola kalea, hesiz inguratuta, eta monolitoa ez dago ohiko lekuan, lanak egiteko lurretik atera baitute. Gasteizko Udalaren arabera, lanak amaiturik egongo dira martxoaren 3rako, baina sindikatuetako eta Martxoak 3 elkarteko ordezkariak ez dira hain baikorrak. Ikusteko dago ea ordurako lanak guztiz amaituta dauden.
Hala ere, lore eskaintzaren ondoren etorriko da berritasun handiena. Izan ere, Zaramagatik bertatik, elizaren ondotik, ateratzen zen manifestazioa deitu ohi zuten urtero sindikatuek. Frantzia kaletik jaitsi eta Andra Mari Zuriaren plazaraino iristen zen manifestazio hura. Aurten, ordea, protesta ez da Zaramagatik abiatuko, haren ordez Katedral Berriaren eta aipaturiko plazaren arteko «espazioa hartuko duen herri mobilizazio handia» iragarri baitute sindikatuek 18:30etan. Plazan «ekitaldi nagusia» izango da, «Martxoaren 3arekin konprometitutako hainbat artistaren» parte hartzearekin.
Ekitaldiaren nondik norakoak eta parte hartuko duten artisten izenak ez dituzte oraindik iragarri, baina ekitaldi jendetsua espero dute sindikatuek. Mobilizazioak «espazio segurua» izan beharko lukeela aldarrikatu dute batez ere. Horretarako, adin eta mota guztietako jendea parte hartzera animatzeaz gain, Ertzaintzari «bermeak» eskatu dizkiote, beste urte batzuetan poliziak martxoaren 3ko ekitaldien aurrean izan duen jarrera «ezin dela errepikatu» iritzita.
