Hamabi egun igaro dira Donostiako Udalak datorren urterako aurrekontu proiektua aurkeztu zuenetik, eta orain, Donostiako suhiltzaileek salatu dute aurrekontu horrek ez dituela beren beharrak aseko. Hain justu, Donostiako Prebentzio, Su Itzalketa eta Salbamendu Zerbitzuko langileek adierazi dute udalak 2027rako aurkeztu duen aurrekontuak «zero euro» esleitzen dizkiela inbertsio errealei, eta eragotzi egiten duela parkea handitzea eta azpiegiturak hobetzea.
Ohar batean egin dute salaketa. Nabarmendu dute aurrekontu horiek 2026an hasitako blokeoa luzatuko luketela, eta 2023ko egoera errepikatzen duela erabaki horrek. Izan ere, zeresana eman zuen Donostiako Udalak 2024rako aurkeztu zuen aurrekontuak, eta suhiltzaileak mobilizatu egin ziren, baliabide faltak zirela eta. Horren ondoren, 2023ko azaroaren 16an, Eneko Goia garaiko alkateak bere gain hartu zuen hori hobetzeko konpromisoa, baina oraingo aurrekontu proiektua, suhiltzaileen arabera, konpromiso horretatik aldentzen da: «Hitzeman zuen Unesparen bidez bildutako diru sarrerek beti izango zutela izaera finalista, eta parkea handitzeko eta hobetzeko inbertsioetara bideratuko zirela».
Aseguru etxeen Unespa elkarteak ordaintzen die suhiltzaile zerbitzua duten administrazio publikoei, eta dirua suhiltzaileen zerbitzuko inbertsioetarako erabiltzen da. Baina Donostiako suhiltzaileen kasuan, adierazi izan dute ez dutela inbertsioetarako aurrekonturik; alegia, udalak aseguru etxeen elkartearen dirua jasotzen badu ere, ez duela dirua suhiltzaileen zerbitzurako baliatzen.
Zerbitzu izoztua
Denbora luzez egon da izoztuta Donostiako suhiltzaile parkea. 2025eko uztailean, langileek salatu zuten 30 urte zeramatzatela langile kopuru berarekin, eta hori bai aldatu da azken urteetan. Aurten, sei suhiltzaile gehiago sartu dira, eta datorren urterako beste sei gehitzea ere proposatu zuen Jon Insausti Donostiako alkateak aurrekontuak aurkeztu zituenean.
«Lan taldea handitzea beharrezkoa da, baina ezin da instalazioen handitzetik bereizi», diote orain suhiltzaileek. «Gaur egun ia ez dago leku erabilgarririk armairu berriak jartzeko, aldagelak handitzeko eta txaketoiak eta gainerako babes ekipoak behar bezala gordetzeko. Hamabi langile berriek espazio egokiak behar dituzte, arropa garbia eta kutsatuta egon daitekeena bereizteko, eta higiene, segurtasun eta antolakuntza baldintza egokiak bermatzeko», aldarrikatu dute.
Gogorarazi dute 2026ko aurrekontuek behar hori aitortu zutela, eta udalak aurretik planifikatutako jarduera dela eskatzen duten hori. Baina gaineratu dute udalak parkea hobetzeko bost inbertsio partida «blokeatu» dituela jada; 408.000 euro guztira. Epaitegira ere jo zuten suhiltzaileek, eta epaileak ebatzi zuen Unespari dagozkion diru sarrerak suhiltzaile parkera bideratu behar direla, zerbitzua handitzeko eta hobetzeko, esklusiboki eta osorik.
Hortaz, langileek eskatu dute 2027ko aurrekontua behin betiko onartu baino lehen, parkea handitzeko 2026ko bost inbertsio partida horiek eranstea, eta epaiak ebatzitakoa betetzea. «Zerbitzua zabaltzea eta hobetzea ez da aukerazkoa, baizik eta behar operatibo, prebentibo eta antolatzailea. Suhiltzaile eta hiritarren segurtasuna ezin da jokoan jarri!».
Sektore zatitua
Ertz ugari ditu Gipuzkoako suhiltzaileen egoerak; zatituta dago sektorea. Donostiako suhiltzaileen zerbitzua Donostiako Udalak kudeatzen du, eta lurraldeko gainontzekoak Gipuzkoako Foru Aldundiak. Gainera, duela astebete iragarri zuen aldundiak beste suhiltzaile parke bat eraikitzeko proiektua aurrera doala, Aritzetan, Usurbilen.
Gipuzkoako Batzar Nagusiek 2018an onartu zuten Gipuzkoa Babestu 2020-2030 plana, eta bertan jaso zuten lurraldeko suhiltzaileen zerbitzua bateratzeko konpromisoa, Gipuzkoa osoko larrialdien ikuspegi integrala izateko. Hori da Gipuzkoako suhiltzaileek eskatzen dutena, eta azken asteetan indar handiagoarekin.
Izan ere, pasa den abuztuaren 31n iraungi zen bi administrazioek zerbitzu hori elkar kudeatzeko zuten hitzarmena, eta irailaren 4an, aldundiko suhiltzaileen zerbitzuko ofizial guardiaburua, zeina Donostiako suhiltzaile etxean kokatutako postu zentralean lan egiten zuen, bere lanpostutik bota zuen Donostiako suhiltzaileen zerbitzuko zuzendariak, Donostiako suhiltzaileek bulego hori beharrezkoa zutela argudiatuta.
Espero da datorren astean emango dutela administrazioek erabaki horren inguruko azalpen gehiago, baina, suhiltzaileek eskatzen dutena zera da: Donostiako zerbitzuko suhiltzaileen etxean bi zerbitzuentzako zentral bateratua diseinatu, sortu eta eraikitzea, eta bi zerbitzuak bateratzeko xedez, aurrera urratsak egitea.
