Gipuzkoako autoeskolak kexu agertu dira sektorearen gaur egungo egoera dela eta. Izan ere, gidatzeko azterketa teorikoa gainditu duten 6.000 ikasle baino gehiago azterketa praktikoa egiteko zain daude, lurraldeko autoeskolen elkarteak adierazi duenez. Arazo hori Gipuzkoako Trafiko Buruzagitzaren «giza baliabide faltagatik» dela diote, eta salatu dute erakunde horrek aztertzaileen lanpostuak betetzeko egiten duen kudeaketa «penagarria» dela.
Elkarteak azaldu du autoeskolen sektoreko langileek «etengabeko kexak» egin dizkiotela Gipuzkoako Trafiko Buruzagitzari eta Espainiako Gobernuaren ordezkaritzari, baina esan dute kexa horiek ez dutela lortu zenbait aztertzailek lanean segitzea aztertzaile berriak sartu arte. Izan ere, trafiko buruzagitzak abiatua du aztertzaile gehiago hartzeko prozesua, baina oraindik ez du bukatu. Autoeskolen elkarteak esplikatu du gaur egun hamar langileko plantilla batetik lau besterik ez direla lanean ari aztertzaile berrien egoera konpondu zain.
Azterketa praktikoa egin ezin duten ikasleei dagokienez, berriz, egoerak nola eragiten dien azaldu dute: «Ikasle horietako askok gidabaimena behar dute lanean hasteko. Egoerak haiengan sortzen duen haserrea autoeskolek kudeatu behar dugu, baina egoera honen erantzukizuna DGTrena [Espainiako Trafiko Zuzendaritza Nagusia] bakarrik da». Elkarteak nabarmendu du haien erruagatik sortu ez den kalte bat autoeskolak bere gain hartzen ari direla, eta kasu batzuetan egoera hori «arriskuan» jartzen ari dela autoeskolen jarduera bera.
