Hasi dira trenak Donostiako Topo berriko pasabidetik zeharkatzen. Gaur egin ditu Euskotrenek lehen probak trenekin, eta arrakastatsuak izan direla adierazi du Eusko Jaurlaritzako Mugikortasun Jasangarriaren sailak. Sail hori izan da pasabidea topoaren beharretara egokitzeko lanez arduratu dena, zehazki sail horretako Euskal Trenbide Sarea izeneko erakundea. Jakinarazi dutenez, trenak Lugaritzetik abiatu dira, eta Amarako lurpeko geltokira iritsi, Benta Berri eta Kontxa-Erdialdea zeharkatuz. Guztira 4,2 kilometroko bidea.
Proba horien helburua izan da trenak ibilbide osoan behar bezala ibiltzen diren egiaztatzea: bai bihurguneetan, zuzenguneetan, tuneletan... Azaldu dute proba ezberdinak egin dituztela, pisu gehiagoko eta gutxiagoko trenekin. Ibilbideko edozein objekturekiko trenak distantzia nahikoa mantentzen duen ala ez jakiteko izan dira ere proba horiek.
«Euskotreneko makinistak tarte berrian trebatzen hasi aurreko funtsezko urratsa da gaurkoa», adierazi du Susana Garcia Chueca Mugikortasun Jasangarriaren sailburuak. Erantsi du «urrats bat gertuago» daudela tarte berria zerbitzuan jartzetik: «Gabonak baino lehen Gipuzkoako ekialdetik mendebalderako linea jarraitu bat izango dugu, zerbitzu gehiago eta hobeak eskaintzea ahalbidetuko duena»
Zerbitzuaren hobekuntzak nabarmenak izango direla esan du Mugikortasun Sailak. Oharrean adierazitakoaren arabera, pasabide berriak Amarako geltokiko zokogunea desagerraraziko du, hiru geltoki berri jarriko dira eta maiztasuna 7,5 minutura jaitsiko da Añorga eta Pasaia arteko tarte osoan.
