Milaka herritar elkartu dira Baionan Jaka Horien deiari erantzunez, aspaldian hirian izandako mobilizazio handienetako batean. Gaur arte zalantza handiak zeuden sare sozialen bitartez zabaldu den mezuak zenbateko erantzuna izanen zuen baina arrakasta handia izan du. Hiru hitzordu zeuden Baionan: tren geltokian, Herriko Etxean eta suprefeturan. Manifestazio bakarrean bildu dira hirurak, eta Baiona iparraldeko A-63 autopista sarrerara jo dute. Hura blokeatzen ari dira oraintxe.
Askotariko aldarrikapenak ikusi ahal izan dira manifestarien artean. Poliziaren eta faxismoaren kontrako oihuak entzun dira nagusiki, baina justizia sozialaren aldeko mezua zabaldu du batek baino gehiagok. Jaka Horia soinean zutela, 2018an mobilizatu zirela kontatu dute Jean Paulek eta Remik. «Lau urtez saiatu ginen eta ez genuen lortu. Orain gazteengan dugu esperantza. Ez da onargarria nola zanpatzen dituzten. Faxismoa da».
Eguraldi txarrari buru eginez jendetza handia elkartu da Baionan Jaka Horien mobilizazioan. Ohiko mobilizazioetan ikusten ez den jende anitz dago @berria https://t.co/wviVbcQEg4
— Ekhi Erremundegi (@EkhiErremundegi) October 17, 2026
Lizeoetako ikasle andana ere agertu da. Horien artean, Mauleko laborantza eskolako gazte batzuk. «Oso baldintza kaxkarrak ditugu. Alta, gure gurasoek 2.000 euro ordaintzen dituzte gu hemen egoteko», adierazi dute. Hiru neska eta mutiko batek osatutako laukotean ez dute manifestazioetan ibiltzeko ohiturarik. «Gure lizeoko egoeragatik gaude hemen, baina baita egoera orokorragatik ere».
Manifestazioa hasi denetik oso Polizia gutxi ikusi da inguruetan. Oraingoz ez dute esku hartu, eta ez da istilurik egon.
@berria Larunbata, 16:00ak, autopista erabat blokeatua da Baionan. Zuhaitz batzuk jarri dituzte errepidean. Milaka jende dago oraindik hemen @berria https://t.co/pi3VexvEQ7
— Ekhi Erremundegi (@EkhiErremundegi) October 17, 2026
EH Baiko diputatu Peio Dufauk babesa adierazi dio mobilizazioari, eta adierazi du ikasle, suhiltzaile zein funtzionario, denak ere nazkatuta daudel egungo egoerarekin. «Zoratzeko moduko prekaritate egoera batera iristen ari gara, eta izapidetzen ari den aurrekontuak adierazten du denek gerrikoa are gehiago estutu beharko dutela», gehitu du Sud-Ouest hedabideari egindako adierazpenetan. Hala, salatu du erabaki politikoak «desparekotasunean» sakontzen ari direla.
