Geroaren lehen notak zabalduko ditu EHZk

30 urte beteko ditu aurten EHZ Euskal Herria Zuzenean festibalak. Joan den abenduko prentsaurrekoan abisua eman zuten antolatzaileek: «Ez da nostalgiarako tenorea». 30 urteko ibilbidea markatzeko, abendutik hona podcast bat eta liburu bat karrikaratu dituzte. Larrazkenean, berriz, dokumental batek borobilduko du festibalaren urtemuga. Karpak, ostatuak eta azpiegitura osoa plantan emateko lanak finitzen ari direla, Geroaren lehen notak lelopean hasiko dute aurtengo aldia Arberatze-Zilhekoan (Nafarroa Beherea), gaur arratsaldetik igande gauera artio.

Auzolanean, trukean eta autogestioan oinarriturik, 1996an Arrosan (Nafarroa Beherea) hasi eta Arberatze-Zilhekoako soroetara iritsi bitarte, «bere burua eraldatzen» jakin du EHZk, antolatzaileek kontatu dutenez. Hala, Idauze-Mendi (Zuberoa), Heleta (Nafarroa Beherea), Lekorne (Lapurdi) eta Irisarri (Nafarroa Beherea) iraganik, Arberatzen segituko du aurten. Antolatzaileen erranetan, hastapeneko balio berak ditu festibalak, eta horri esker bizirik iraun du.

Ohi bezala, beraz, festibalak hiru egun iraunen du, eta ohiko formatua izanen du. Euskal Herriko eta kanpoko musika taldeek osatu dute aurtengo programazioa. Denetariko estiloak izanen dira, eta, kontzertuak ez ezik, mintzaldiak, ikusgarriak eta tailerrak ere antolatu dituzte. Siwanaba eta Xistor of Down taldeek hasiko dute festibala gaur, eta ebiakoitzean, berriz, Bele, DAM talde palestinarra, Merina Gris, Jonkass eta RTZ ariko dira, bertzeak bertze.

Egun horretan, plazako programazioa goizetik hasiko da. Bertan ere denetarik atzeman dezakete festibalera joandakoek. Bertso saio musikatua antolatu dute, eta bertan kantatuko dute Miren Artetxek, Ekhiñe Zapiainek eta Haira Aizpuruak. Musikan, Lora Lazkano, Maiana Agerre eta Bastien Marianne ariko dira. Gaizka Chamizoren Heroiaren mina ikusgarria eta Bilaka kolektiboaren azken dantza pieza ere goiz berean ezagutzen ahalko dituzte ikusleek.

Berritasun gisa, zirku karpa bat eman dute lehen aldikotz. Ebiakoitzetik hasirik, hainbat ekitaldi izanen dira bertan. Libertivore konpainiak irekiko du karpa, eta, egun horretan, Gilkitxaro antzerki taldearen pieza eta Maialen Lujanbioren RR ikusgarriak izanen dira. Igandean, berriz, mintzaldi batekin hasiko da bertako programazioa, eta laborantzan baliatu pestiziden eraginez ariko dira hizlari franko. Arratsaldez, Batcharte konpainiak dantza emanaldia emanen du, eta karpak ateak hetsiko ditu Martzelinaren eta Esacto’lidoren ondotik.

Eskaintza politikoa

Eztabaida xokoa ere egun horretan irekiko da, eta igandea bitarte hitzaldi franko eginen dira. Ebiakoitzean, EHZ: Auzolanaren lurretan liburua presentatuko du Aitor Servierrek. Bertzalde, Mijo Lizarzaburu lodifobiaz eta kontrol mekanismoez ariko da; eta DAM taldeko kideak, kontzertua emateaz gain, Palestinaren egoera kulturalaz solastatuko dira. Eskuin muturraren estrategia komunikatiboak aztertuko ditu Antton Rouget kazetariak, eta haur transen egoeraren berri emanen du Naizen elkarteak.

Igandean, berriz, bi hitzaldi baizik ez dira izanen eztabaida xokoan. Euskararen presentzia pantailetan hizpide izanen dute Urtzi Urkizu BERRIAko kazetariak eta Xumar Altzugarai Pantailak Euskaraz-eko bozeramaileak. Festibalaren egitarau osoa ehz.eus webgunean kontsulta daiteke.

Feminismoak, antikapitalismoak, ekologiak, askatasun sexualak eta kultur aniztasunak definitzen dute festibala. Ondorioz, edozein motatako erasoen kontrako protokoloak plantan ezarri dituzte EHZn. Errate baterako, eraso sexisten, transfoboen, lesbofoboen, homofoboen eta arrazisten kontrakoak. Protokolo hori martxan emanen dute soilik eraso bat gertatuz gero. Azaldu dutenez, denendako segurua den leku bat lortzeko, protokoloa prestatzeaz gain, prebentzioa ere landu behar da.