Malen Osa bueltan da, eta nazioartean entzute handia duen proba batean garaipena lortuta itzuli da, gainera: Skyrace des Matheysins lasterketan (25 km, 2.000 m+) lasterketan garaile izan da gaur korrikalari oñatiarra, Skyrunner World Series zirkuituko seigarren proban. Hain zuzen, duela hiru aste zirkuitu bereko Calamorro Skyrace proban laugarren kilometroan erretiratu beharrean izan zen, karranpekin zituen arazoak zirela medio, eta handik pare bat egunera etenaldi bat egingo zuela iragarri zuen, «arazoaren jatorria aurkitu eta mentalki prest egon arte». Geroztik, entrenatzen jarraitu du, eta aste honetan Zegama-Aizkorri mendi maratoian parte hartuko duela jakinarazi dute antolatzaileek. Gaur, berriz, garaipenaren poza eta konfiantzaren bidea berreskuratu ditu Osak. Zegamarako bultzada handia izan daiteke gaurkoa.
Frantziako Matheysine eskualdean egiten da Skyrace des Matheysins lasterketa. Ez da lasterketa luze-luzea kilometrotan, baina bai oso alpinoa eta bizia. Azken asteetan zalantza handiak izan dituzte antolatzaileek, goiko eremuetan pilatutako elurragatik, baina azkenean jatorrizko ibilbidea egiteko moduan izan dira, eta baldintzak oso egokiak izan dira korrikarako.
Osak lasterketa burutsua egin du, ibilbidea ondo irakurriz eta indarrak ondo kudeatuz. Lehen kilometroetan, Johanna Gelfgren suediarra joan da buruan. Sentier du Diable bidezidorraren hasieran (7,7. km), laugarren zen Osa, eta probaren erdibidean, Col du Tabor gainean (12 km) aurrena jarri da. Hortik aurrera, aurkariekiko aldea areagotzen joan da oñatiarra, eta pozez eta oso hunkituta helmugaratu da Saint-Honore herrian (2.49.51), ikurrina eskuetan zuela. «Garbi nuen lasai hartuko nuela eta nire lasterketa egingo nuela. Ez naiz guztiz ondo sentitu igoeretan, baina kontzentratuta jarraitu dut. Atzetik aurrera postuak aurreratzen joan naiz, harik eta gailurrean aurrena jarri naizen arte. Gero, tartea zabaldu ahal izan dut jaitsieran. Garaipen hau izugarri garrantzitsua da niretzat», adierazi du helmugan.
Eva Delafosse frantziarra izan da bigarren (2.52.28), eta Fabiola Conti italiarra hirugarren (2.58.36). Osaren garaipenaz gain, nabarmentzekoa izan da euskal korrikalarien lana. Hamar aurrenekoen artean beste bi lasterkari helmugaratu dira: Oihana Zubillaga (Domusa Teknik) zazpigarren (3.00.50) eta Lide Urrestarazu euskal selekzioko kidea zortzigarren (3.03.39). Ainara Alcuaz hamaseigarren izan da (3.10.47) eta Leire Uribe hamazazpigarren (3.11.08).
Gizonezkoetan, Frederic Tranchand frantziarra izan da garaile, trail laburretan munduko txapelduna eta lasterketa teknikoetan nazioarteko espezialistarik handienetakoa. Hasieratik helmugara lasterketaren buruan joan da Tranchand (2.19.59). Bigarren Alex Oberbacher italiarra izan da (2.24.09) eta hirugarren Mattia Bertoncini (2.24.17), hau ere italiarra.
Euskal ordezkarien artean, Paul Ormaetxea euskal selekzioko kidea ozta-ozta ez da sartu hamar aurrenekoen artean. Muruetarra (Bizkaia) hamaikagarren izan da (2.30.34). Hodei Samaniego 21. helmugaratu da (2.36.11).
Skyrace des Matheysins probako sailkapen guztiak, esteka honetan.
