Mendiko irudi ikusgarriak Bilboko lurpean

CVCE Photo lehiaketako argazki sarituen eta hautatuen erakusketa zabaldu dute aurten ere BBK Mendi Film Bilbao Bizkaiak eta Metro Bilbaok. Abenduaren 15era arte formatu handiko 20 irudi izango dira ikusgai metroko hainbat geltokitan.

Mendi Film eta Metro Bilbaok Donostiako CVC Photo lehiaketako argazkien erakusketa zabaldu dute
Aurtengo Mendi Filmeko kartelaren argazkia, Lei Bao txinatarrarena, metroko geltokietako batean. MENDI FILM
ramon olasagasti
2026ko azaroaren 19a
15:30
Entzun 00:00:00 00:00:00

Urteroko ohiturari jarraituz, Bilboko Metroko hainbat geltoki mendiko argazki ikusgarriz jantzi dira egunotan, Mendi Film jaialdiaren bezperetan. Aurten ere BBK Mendi Film Bilbao Bizkaiak eta Metro Bilbaok elkarlanean CVCE Photo lehiaketako argazki sarituen eta hautatuen erakusketa inauguratu dute. Horrenbestez, Donostiako Club Vasco de Camping Elkarteak sustatzen duen mendiko jardueren nazioarteko argazkilaritza lehiaketa entzutetsu horretako hogei obra nabarmenenak formatu handian ikus daitezke Santutxu, Eliptikoa, Santimami, Deustu eta Abandoko geltokietan. Abenduaren 15era arte egongo dira argazkiak ikusgai.

Plaza Eliptikoko geltokiko argazkietako batean, Nico Favresse eskalatzaile belgikarra ageri da, besoak gurutze, Tsaranoroko (Madagaskar) Karombony horma ikusgarriari itsatsita, hatzekin hormako zimur txikiena haztatu nahian. Jan Novak argazkilariarena da irudia, aurtengo CVCE Photo lehiaketako sari nagusia.

JAN NOVAK-EN 'TOUG ENOUGH' ARGAZKIA
Jan Novaken 'Tough Enough' irudia, CVC Photo lehiaketako sari nagusia. JAN NOVAK

Aitortza nagusi horrez gain, beste zenbait sari berezi ere izaten dira. Horietako bat, hain zuzen, BBK Mendi Film Bilbao Bizkaia jaialdiaren kartelerako irudia izaten da. 2026an, Lei Bao argazkilariak Txinako Guangxi eskualdeko tiankeng edo putzu sakon batean ateratako argazkia da jaialdiaren 19. ekitaldiko kartela.

EITB Saria Kevin Youngentzat izan da aurten, Zulotik ateratzen argazkiagatik. Esplorazio espeleologikoko eszena bat da, eta irudian espeleologo bat azalera igotzen ageri da Galdamesen (Bizkaia), meategi mailen arteko lotura lanaldi baten ondoren. Euskal Mendizale Federazioaren Saria Chechu Arribasek eskuratu du, Rider of Storm argazkiari esker. Irudiak mendiko ertz baten gogortasuna erakusten du hotz, laino eta haize baldintza muturrekoetan, eta ematen du protagonista zaldiz doala ekaitzaren begian. Epaimahaiaren Sari Berezia Yhabril Mororentzat izan da, White Dance lanagatik.

Metro Bilbaokoa, BBK Mendi Film Bilbao Bizkaia jaialdiaren egitarauan aurkeztutako bigarren erakusketa da. Aurreko astean zabaldu zuten Itsasmuseumen Yhabril Mororen Yhabril’10 – 10 años de luz, montaña y acciĂ³n erakusketa.

Kazetaritza etikoaren arabera sortua

Nola bermatzen dugun edukien kalitatea

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Zure babes ekonomikoari esker egiten dugu kazetaritza konprometitua. BABESTU BERRIA