AEB Ameriketako Estatu Batuetako Ordezkarien Ganberak ia aho batez onartu du Jeffrey Epstein finantzari dirudunaren inguruko agiriak kaleratzea. Adingabeei sexu abusuak egiteagatik auzipetuta zegoen kartzelan hil zenean. Gaur egin dute bozketa, Behe ganberan, eta argigarria izan da azken emaitza: aldeko 427 boto bilduta onartu dute egitasmoa, eta kontrako boto bakarra izan da —433 kide ditu Ordezkarien Ganberak—. Behin lege egitasmoa onartuta, orain Senatuak bozkatu beharko du. Eta ondoren, Donald Trump presidentearen txanda izango da. Hark izango du azken hitza.
Presio handia izan du Etxe Zuriko maizterrak azken astean. Behe ganberako diputatu demokratek Epsteinen hiru mezu elektroniko eman zituzten argitara. Mezu horietan, Trumpek abusuen berri zeukala eta biktimetako batekin «orduak» igaro zituela iradokitzen zuen finantzariak.
Thomas Massie (errepublikanoa) eta Ro Khana (demokrata) diputatuek lege egitasmo bat bultzatu zuten, Justizia Sailari presio egiteko, adingabeei sexu abusuak egiteagatik auzipetutako finantzariarekin lotutako dokumentu guztiak argitaratu ditzan. Egitasmo horrek 218 sinadura behar zituen aurrera egiteko, eta iragan astean lortu zituen. Horregatik egin dute gaur bozketa behe ganberan.
Bozketa Euskal Herrian 20:00ak inguru zirenean abiatu dute, eta handik ordubetera iritsi da emaitza. Aldeko 427 boto jaso ditu proposamenak, eta diputatu bakarrak bozkatu du kontra. Clay Higgins errepublikanoa izan da, Trumpen gertuko diputatua.
Emaitza argigarria izan den arren, espero zitekeen proposamenak aurrera egitea. Orain arte agiri horiek argitaratzearen aurka agertu izan da Trump. «Demokratak Jeffrey Epsteinen inguruko gezurra berpizten saiatzen ari dira, administrazio federalaren itxieraren kudeaketa kaskarretik arreta desbideratzeko», idatzi zuen iragan astean Truth Social sare sozialean. Asteon, ordea, iritzia aldatu du; ez da dokumentuak argitaratzearen alde agertu, baina «berdin» zaiola idatzi zuen atzo, sare sozial berean.
Lege proiektua, orain, Senatura igaroko da. Goi ganberak onartzen badu, Trumpen eskuetara iritsiko da. Behin presidenteak sinatuz gero, Justizia Sailak bere eskuetan dituen dokumentu guztiak argitaratu beharko ditu. Horren inguruan galdetuta, Trumpek zera esan zuen atzo kazetarien aurrean: legea bere mahai gainera iristen bazen, sinatu egingo zuela.
