Artikoa izotzik gabe geratuko da datozen urteetan

LONDRES. «Beranduegi» da Ozeano Artikoaren urtzea eragozteko. Horixe ohartarazi dute zenbait zientzialarik, atzo argitaratutako ikerketa batean. Berotegi efektuko gasen isuriak asko murriztuta ere, 2030-2040 artean izotzik gabe geratuko da Ozeano Artikoa, garai jakin batzuetan, eta joera hori izango da datozen hamarkadetan ere. Ikerketaren arabera, gizakiak eragindako berotze globalaren ondorio da urtzearen %90.

Ozeano Artikoak irailean izan ohi du urteko izotz gutxien. Orain arteko datuen arabera—1979an hasi zen NASA sateliteko irudien bidez irudiak erregistratzen—, 2013koa izan zen izotz gutxieneko uda, eta, ondoren, 2021ekoa. Ikertzaileen arabera, 1979tik %12,6 murriztu da Ozeano Artikoko udako izotza hamarkada bakoitzean. Eta klima krisiaren adierazgarri «argigarrienetakoa» da hori.

Ozeano Artikoko izotza udan erabat urtzeko arriskua 2040 eta 2050 bitartean zehaztu zuen IPCC Klima Aldaketari Buruzko Gobernu Arteko Taldeak 2021ean zabaldutako txostenean. Baina atzo argitaratutako ikerketan hamar urte aurreratu dute epe hori.