Hasi da espetxealdia betetzen Jair Bolsonaro Brasilgo presidente ohia (2019-2023). 2023ko urtarrilaren 8an Luiz Inazio da Silva Lula presidentearen aurka estatu kolpea ematen saiatzeagatik 27 urteko zigorra ezarri zion irailean Brasilgo Auzitegi Gorenak, eta gaur hasi da zigorra betetzen. Etxeko atxiloaldian zegoen, baina larunbatean Auzitegi Goreneko epaile Alexandre de Moraesen aginduz Brasiliako komisaria batean sartu zuten preso. Epailearen esanetan, Bolsonarok ihes egiteko arriskua zegoen. Izan ere, presidente ohia eskumuturreko elektronikoa hausten saiatu zen.
Gorenak Bolsonaron abokatuek aurkeztutako errekurtsoak baztertu izan dituzte, eta defentsak ez du beste errekurtsorik aurkeztu —atzo amaitzen zen horretarako epea—. Hala, auzitegiak espetxealdia hasteko agindua eman zuen atzo. Larunbatetik preso dagoen polizia etxean jarraitzen du.
Brasilgo epaitegi batek lehen aldiz jo du errundun presidente ohi bat estatu kolpe saiakeragatik. Gainera, delitu hauengatik ere zigortu zuten: zuzenbide estatua desegiten saiatzea, ondasun publikoei eta ondareari kalte egitea, eta erakunde kriminal bateko kidea izatea.
