Brasilgo hauteskunde orokorretan balantzekin bezala gertatu da: zenbat eta muturrerago egon, orduan eta dinbili-danbala handiagoa sortzen dela. Aurreko hauteskundeetan, Luiz Inacio da Silva Lulak nahikoa zama jarri zion ezkerreko aldeari, eta lortu zuen Jair Bolsonaro presidente ohia (2019-2023) oposizioan zokoratzea; oraingoan, ordea, beste Bolsonarotar bat izan du lehiakide, Flavio Bolsonaro, eta jarduneko presidenteak ezin izan dio mailari eutsi. Boto ia guztiak zenbatuta, PL Alderdi Liberaleko presidentegai ultraeskuindarrak botoen %47,03 lortu ditu, eta PT Langileen Alderdiko presidentegai aurrerakoiak, berriz, botoen %45,16. Ezein hautagaik ez du lortu botoen erdiak eskuratzea, eta, hortaz, Bolsonarori eta Lulari berriz ere egokitu zaie balazta gainean jartzea, azkenerako zama handiena nork izango. Datorren urriaren 25ean izango da hori, orduantxe egingo baitute hauteskundeen bigarren itzulia.
«Aldaketa nahi du Brasilek; horixe da irakurketa», ospatu du bart Bolsonarok, hauteskunde orokorretako emaitzak jakin berri. Brasilian egindako agerraldi batean, adierazi du «oso pozik» dagoela, botoa eman diotenek «konfiantza» izan dutelako harengan «demokrazia» errespetatzen duen gobernu bat osatze aldera: «Kezkatuta nago Brasilen etorkizunarekin, eta jarrera horri eutsiko diot datozen hiru asteotan, bigarren itzulira arte».
Kopuruei erreparatuz gero, bi milioi boto pasaren aldea atera dio Bolsonarok Lulari: PLkoak 56,1 milioi lortu ditu, eta PLkoak, berriz, 53,8 milioi. Presidentegai ultraeskuindarrak bere aitak baino emaitza hobea lortu du, 2022ko hauteskunde orokorretan 51 milioi eskuratu baitzituen Jair Bolsonarok, zeina 27 urteko espetxe zigorra ari den betetzen, etxeko atxiloaldian —Brasilgo Auzitegi Gorenak errudun jo zuen iaz, 2023ko urtarrilean, Lulak bere hirugarren agintaldia hasi berritan, presidentearen kontrako kolpea ematen saiatzeagatik—.
Batera edo bestera, jakina zen Lula bigarren itzulira igarotzekoa zela, baina duela lau urteko emaitzekin konparatuz gero, 3,4 milioi boto inguru gutxiago lortu ditu lehen itzulian. Hiru aldiz izan da presidente: 2003tik 2011ra bi agintaldi egin zituen jarraian, eta 2023an berriz ere hartu zuen kargua. Ikusteko dago hori laugarrenez egitea lortuko ote duen. Bart egindako agerraldi batean, ohartarazi du lehiakideak «ziurgabetasuna» ekarriko diola herrialdeari, eta gaurtik aurrera «beste kanpaina» bat hasiko dela: «Prest egon daitezela Bolsonarotarrak».
Ia 159 milioi herritarrek zuten bozkatzeko aukera, eta bostetik ia lauk eman dute botoa, botoa ematea berez derrigorrezkoa izanagatik ere: abstentzioa %21,08koa izan da, 1998ko hauteskunde orrokorrez geroztiko handiena (%21,49); duela lau urte %20,9koa izan zen.
Hamar bototik bederatzi (%92,19) Bolsonarok edo Lulak eskuratu dituzte, eta Brasilgo presidente izateko lehiatik geratu dira, hortaz, gainontzeko hautagaiak: besteak beste, Avante alderdi zentristako Escritor Augusto (%2,89), Missao alderdi ultrako Renan Santos (%2,24) eta PSD Alderdi Sozialdemokratako Ronaldo Caiado (%2,18). Augustok eta Santosek iragarri dute ez dutela ezein presidentegairen alde egingo; Caiadok, berriz, esan du bere alderdiko buruekin kontsultauko duela zer jarrera hartu.
Informazio gehiago, berehala.
