Ezbeharra gertatu da bart gauean Suitzako Crans Montana eski estazioan. Urte berriko 01:30 aldera, sute bat piztu da Le Constellation tabernan, eta «dozenaka lagun» hil dira han, Frederic Gisler Valais kantoiko Poliziako komandanteak jakinarazi duenez. Zauritutakoak ehundik gora izan litezke, eta horietako asko larri leudeke, Poliziaren arabera. Besteak beste, 40 anbulantzia, hamar helikoptero eta larrialdietako 150 bat langile joan dira ingurura, barruan zeudenak sorostera.
Oraindik ez dago informazio sobera gertatutakoaren inguruan, eta zenbat lagun hil diren ere zehazteko dago. Suteak «jatorri ezezaguna» du oraingoz, baina Poliziak baztertu egin du jada sutea atentatu baten ondorioz piztu izanaren hipotesia. Hasiera batean zabaldu bada ere eztanda batek piztu duela sutea, gero argitu dute suaren jatorrian ez dela leherketarik egon, eta suak berak eragin duela taberna barruan zegoen material piroteknikoak eztanda egitea.
Oraingoz, lehentasun gisa jarri dute hildakoak identifikatzea, Beatrice Pilloud Valaisko prokuradoreak esan duenez. Crans Montana Suitzako hego mendebaldean dago, eta 10.000 pertsona inguru bizi dira han, baina leku turistikoa izan ohi da udan nahiz neguan. Horregatik, Pilloudek azaldu du litekeena dela hildakoen artean Suitzatik kanpoko jendea egotea. Hala ere, oraingoz dagoen informazioaren arabera, ez dago euskal herritarrik hildakoen edo zaurituen artean.
Informazioa eguneratzen ari gara
