Mundu zabaleko 140 ikertzailek egiten dute Global Carbon Budget ikerlan globala, C02 isurien eboluzioa neurtze aldera, eta horra, aurten beherakada bat izango dela aurreratu dute: %0,4 urrituko dira. Pandemiaz geroztik lehen aldia erregai fosilekin lotutako isuriak jaisten direla.
Mundu zabalean energia eskariak handitzen segitzen badu ere, energia berriztagarriak gero eta gehiago erabiltzen direla nabarmendu dute —eolikoa eta eguzkiaren bidez lortzen dena propio aipatu dituzte—, auto elektrikoen erabilera ere ugaritzen ari dela, eta arrazoi horiek daudela, besteak beste, apaltzearen atzean. «Teknologia garbiak benetako aldea ekartzen ari dira isuri globalen murrizketan», ondorioztatu dute ikerlanaren berri emateko atera duten oharrean. Aurreratu dute alor horretan «azelerazio bat» egiten bada benetako joera aldaketa bat bultza daitekeela.
Irango gerra ere zerrendatu apaltzearen motiboen artean; otsailean AEB Ameriketako Estatu Batuek Iranen kontrako operazio militar bat abiarazi zuten eta ordutik petrolioa garraiatzeko arazoak ugaritu egin dira, eta garestitu egin da. Ondorioz, petrolioaren ondoriozko isuriak %1,9 urrituko direla ondorioztatu dute. Azterlanaren egileek nabarmendu dute, hala ere, krisi geopolitikoen bidez ez zaiela konponbidea jarriko isuriak murrizteko ezarrita dauden zailtasunei. «Egiturazko aldaketak» behar direla gogoratu dute, eta aurtengo datuetara begira atzera ere egin dela hainbat eremutan. Basoen suntsiketaren ondoriozko isuriak, esaterako, handitu egingo dira: %1,2.
C02 isuriak murriztuta bilatu nahi da, batez ere, Lurreko tenperaturaren igoera apaltzea. Goraka ari da urteotan eta 1,5 graduko langa gainditzeko, «egungo erritmoan», lau urte baino gutxiago geratzen direla gogoratu dute. Horiek horrela, energia berriztagarriak bultzatzatzeko eta erregai fosilen erabilera urritzeko neurriak hartzen jarraitu behar da.
Herrialdeka
Herrialdekako azterketa ere egin dute ikertzaileek. Isurien %32, esaterako, Txinak egiten ditu, baina «aktibo» antzeman dute ikertzaileek joera aldaketa batean: %0,9 murriztuko ditu aurten isuriak. Indian, aldiz, igoera izango dute: %4,4koa.
Orokorrean, murrizketa ikusiko da, hala ere, herrialde askotan: EB Europako Batasunean, AEB Ameriketako Estatu Batuetan eta Japonian %1 baino gehiago murriztuko dituzte isuriak.
