Kontuan hartuta batzuk zein besteak zer esaten ari diren eta zein mugimendu egiten ari diren, ez dirudi Espainiako ezker konfederala bat eginda aurkeztuko denik azaroaren 29an egitekoak dira Espainiako Gorteetarako hauteskundeetara. Gaur gauerdian bukatzen da bozetarako koalizioak erregistratzeko epea, eta Fronte Zabalak —Sumar Mugimendua, IU Izquieda Unida, Comuns, eta Mas Madrid— eta Podemosek nekez osatuko dute hautagaitza bateratu bat estatu mailan; besterik dira erkidego batzuetan egin diren aliantzak.
Eta azken hilabeteetan batasun horren alde mintzatu denetako batek, Gabriel Rufian ERC Esquerra Republicanaren Kongresuko liderrak, «porrot» egin dutela nabarmendu du. «Ziurrenik, ez da gertatuko. Gustatuko zitzaidan fronte bateratu benetako bat egotea, Esquerraren eta Comunsen arteko akordio bat, baina ematen du ezetz, ez dela gertatuko», adierazi du gaur elkarrizketa batean, Rac1 irratian.
Azken asteetan esparru horretako buruzagiek egindako adierazpenek erakusten dute zerk baldintzatu dituen negoziazioak: zerrendak kontrolatzeko nahiak, eta liderren arteko harremanek. 2023an bat eginda aurkeztu ziren Podemos eta Sumar —Compromis, IU eta Comuns batu zituen—, azken unean; hori bai, Irene Montero beren liderretako bati Sumarrek jarritako betoa asumitu behar izan zuen Podemosek. Indar bozkatuenen artean laugarrena izan zen ezker konfederala: 33 aulki, botoen %12,3. Gaur gaurkoz, inkestek batez bestekoak botoen %6,3 ematen diote Sumarri, eta %3,2 Podemosi; hau da, %10 ere ez.
ERCk eta Podemosek bai, horiek akordio bat egin dute. Horren arabera, Podemos ez da aurkeztuko Katalunian —Podemen kideren bat joango da ERCren zerrendetan—, eta Rufianek Irene Montero Podemoseko liderretako baten aldeko kanpaina egingo du Madrilen.
Hain zuzen, ikusitakoak ikusita, ez du ematen Madrilen, Katalunian, Valentzian eta Andaluzian —aulki gehien banatzen dituzten erkidegoetan— bat eginda aurkeztuko direnik. Podemosek planteatu dio IUri, Sumarren adarretako bati, hamar erkidegotan bat eginda aurkeztea: Andaluzian, Asturiasen, EAEn, Extremaduran, Galizian, Gaztela eta Leonen, Gaztela-Mantxan, Kantabrian eta Nafarroan eta Murtzian. IUk, baina, uko egin dio, eta, gainera, Podemosen jarrera kritikatu.
Ikusi gehiago
Podemosek primario irekiak planteatu zituen, eta Espainiako ezker konfederaleko alderdietako buruak horietan parte hartzera gonbidatu. Herenegun eta atzo egin zituzten, eta gaur dira emaitza jakinaraztekoak. Montero bakarrik aurkeztu da horietara, ordea.
Akordioak
Fronte Zabalaren presidentegaia Ada Colau Bartzelonako alkate ohia izango da. Astelehenean jakinarazi zuten. Bi egun geroago adierazi zuen hautagaitzari uko egiteko prest legokeela, horrek Fronte Zabalaren eta Podemosen arteko akordio bat errazteko balioko balu; are, Fronte Zabalari izena aldatzeko prest agertu zen. Atzo, aldiz, Fronte Zabaleko alderdien Podemosen aldean Kongresuan duten «pisua» aldarrikatu zuen. Fronte Zabala bihar da bere logotipoa aurkeztekoa Madrilen, ekitaldi batean.
Bitartean, ezker konfederalak askotariko akordioak egin ditu azken orduetan zenbait erkidegotan: Aragoin — Chunta Aragonesistak eta Fronte Zabalak—, Balearretan —Sumarrek, Mesek eta Esquerra Unidak—, eta Kanarietan —Podemosek, Kanaria Berriak, Sumarrek eta IUk—.
